Кёп болмай Экинчи Чегемни 3-чю номерли орта школунда къууанч халда «Къоркъуусузлукъну лабораториясы» ачылгъанды. Анга Чегем муниципал районну администрациясыны башчысы Юра Борсов, билим бериу управленияны  бла ич ишлени бёлюмюню  таматалары   Жанна Арипшева,  Мурат Хажнагоев, школчула,  жаш инспекторла, устазла автоинспекторла,  полицияны  акъылбалыкъ болмагъанланы ишлери жаны бла   бёлюмюню келечилери  эм башхала  къатышхандыла.

Байрам программадан сора, къонакъланы  комплексни  оборудованиясы эм техникасы бла шагъырейлендиргендиле.  Гитче шахарны мектебинде жолла,  светофорла, белгиле, ызла, улоу тохтагъан жерле эм башха затла да бардыла. 

Сабийле  практиканы  велосипедледе ётедиле. Аны бла бирге биринчи медицина болушлукъ этерге да юйренедиле, ол санда реанимация жумушланы кючлерча энчи маникен  барды.

 - Сабийлени саулукъларындан эм жашауларындан багъалы зат жокъду. Ол себепден бизни баш борчубуз ала жолда къоркъуусуз жюрюрча этергеди. Бу жаны бла эм магъаналы ишледен бири уа  алагъа баш  жорукъланы танытыргъады.  «Къоркъуусузлукъну лабораториясы» –  бу жаны бла ахшы себеплик этерикди. Быллай мобил комплекс бла Чегем районну битеу школлары жалчытылынырыкъдыла. Гитчеле оюн халда жорукъланы сюйюп билликлерине да ишеклик жокъду,- дегенди Мурат Хажнагоев.

Бизни корр.