Жер юсюне жаратылгъан назмучуланы бек фахмулуларыны къауумуна киргенледен бири Къулийланы Къайсыннга быйыл 105 жыл толлукъ эди. Миллетибизни закий жашына кёп белгили къырал къуллукъчула, айтхылыкъ адамла да сый бергендиле, аны терен магъаналы назмуларындан сёзле бла кеслерини оюмларын ачыкъларгъа да ёч болгъандыла.

Поэтни быйылгъы юбилей жылында уа «Къайсыннга 100 атлам» эм Мечиланы Кязим атлы фондланы, Черек районну администрациясыны, къолдан усталаны «Уста» ассоциациасыны эм  Къулийланы тукъумну башламчылыкълары бла Къабарты-Малкъаргъа Ставрополь крайны  Жазыучуларыны союзуну келечилери келгендиле. Бу делегацияны жолоучулукъгъа къурарны юсюнден тилек письмо «Къайсыннга 100 атлам» фонд Ставрополь крайны губернатору Владимир Владимировха юсюбюздеги жылны август айында жиберген эди.  

Письмогъа Губернаторну администрациясындан ыразылыкъ къагъыт келген эди. Фонд регионну таматасына бу  жумушха себеплик этгени ючюн ыспас этеди. Быллай тюбешиуле регионланы араларында маданият байламлыкълагъа себеплик этип, шуёхлукъну кючлерге болушханларын чертирчады.  

Бу кюнледе Ставрополь крайны Нальчикге келген делегациясына оноулан киредиле. Анга РФ-ни Жазыучуларыны союзуну регион бёлюмюню Правленини таматасы Александр Куприн башчылыкъ этеди. Алагъа деп къонакъбайла сейир тюбешиуле бла жолоучулукъла  къурагъандыла. Аладан биринчиси бараз кюн Мечиланы Кязим атлы фондда ётгенди. 

Къонакълагъа, тау адетдеча, гоппан аякъ бла тюбегендиле.  Къоншу регионну белгили назмучуларыны бла жазыучуларына «Хош келигиз!» дерге ары Къулийланы Къайсынны юй бийчеси Элизат Эльбаевна, КъМР-ни Жазыучуларыны союзуну правленини таматасыны орунбасары Беппайланы Муталип, «Минги тау» журналны баш редактору Додуланы Аскер, филология илмуланы докторлары Биттирланы Тамара бла Ёзденланы Фатима, журналистле, алимле эм миллет маданиятыбызны келечилери келген эдиле.

Тюбешиуню ача, Мечиланы Кязим атлы фондну таматасы Аппайланы Лариса организацияны ишин ачыкълагъан презентация бла жыйылгъан къонакъланы шагъырей этгенди.  Ызы бла сёз Кязимни эм Къайсынны малкъар адабиятны къуралыууна салгъан къыйынларыны юсюнден баргъанды. Аланы назмуларын да окъугъандыла.

Андан сора келгенлеге жырчы Гергъокъаланы Халимат  Къулий улуну «Тост» деген назмусуна этилген жырын саугъалагъанды. «Насып» ансамбль а «Къол жаулукъ» миллет тепсеуню кёргюзтгенди.

Ызы бла «Къайсыннга 100 атлам» фондну таматасы Тетууланы Хадис къонакъла бла жыйылгъанланы танышдыргъанды. Ставропольдан келгенлени къауумуна кирген жазыучуланы атларындан Александр Куприн сёлешгенди.

- Бек алгъа былайда олтургъан Беппайланы Муталип эм Додуланы Аскер бла шуёхлукъ жюрютюуюбюзню юсюнден айтыргъа сюеме. Аскер Къайсынны сейир багъалай биледи. Аны назмуларын къайда да окъургъа бек ёчдю.

Къулий улуну кесини юсюнден айтханда уа, ол Пятигорскга келирге бек сюйгенди. Аны бла тюбешиу болмагъанча уллу къууанч эди бизге. 1968 жылда Лермонтов окъуула къуралгъандан башлап ёлюп кетгинчи ол байрамгъа Къайсын къатышмай къалмай эди. Ол поэзияны байрамын Ставропольда сакъламагъан хазна адам жокъ эди. Къайсындан а биз хар жолдан жангы назмула излеучю эдик. Ол бизге болмагъанча уллу саугъа эди. Лермонтов окъууланы ахыр ингири шахарны Музыка театрында бардырылыучусу эсимдеди.

Къайсын а аны сахнасындан назмула айтыучу эди, - деп эсгергенди ол.

Андан сора сёз Къулийланы Элизатха берилгенди. Ол Къайсынны эсгериуге къатышханланы барысына да ыразылыгъын билдирип, поэтни китапларын саугъалагъанды эм бир ненча назмусун да окъугъанды.

Тетууланы Хадис а Ставрополь крайны губернатору Владимир Владимировха да китап саугъала жибергенди.

Алимле Биттирланы Тамара, Ёзденланы Фатима, Сарбашланы Алёна, поэтле Беппайланы Муталип бла Додуланы Аскер, журналист Ботталаны Мухтар, «Уста» ассоциацияны таматасы Бачиланы Хамзат, жырчыла Бечелланы Хабаз бла Гузийланы Тахир  Къулий улуну деменгилигини юсюнден айтып, аны назмуларын окъугъандыла.

Озгъан эки кюнде уа къонакъла Чегем эм Черек ауузлада болгъандыла. Чегем шахарда ала Къулий улуну юй-музейинде бла Эл-Тюбюнде,  сора Огъары Малкъарда халкъыбыз жашагъан аламат жерле бла шагъырей этгендиле.

Таппасханланы Аминат.