2030 жылгъа Россейде адам саны 100-500 болгъан гитче эллени барында да 4G интернет ишлерикди. Келир жыл ол къайсыларында болурун сюе эсегиз, Госуслуги порталгъа кирип, 12 ноябрьге дери къол кётюрюрге амал барды. Письмо жазып билдирирге сюе эсегиз а - 26 ноябрьге дери заман бериледи.

Айырыулагъа, айтханыбызча, адам саны жюзден башлап беш жюзге дери жетген элле къатышадыла. Ала ючюн Москвада бла Санкт-Петербургда жашагъанладан къалгъан ким сюйсе да, къол кётюрюрге эркинди. Нек дегенде ол регионла тийишли программагъа кирмейдиле.

Алай бла, къол кётюрюр ючюн сагъынылгъан Госуслуги порталда регистрациягъыз болургъа керекди. Кесигиз да сайлагъан элигиз къайсы регионда эсе да – анда жашаргъа.

Башында айтылгъаныча, сайлауугъузну юсюнден РФ-ни Цифралы айнытыу министерствосуна къагъыт письмо жазып да билдирирге боллукъсуз. Кесин да ма бу адресге: 123112, Москва, Пресненская набережная, 10, 2-чи мекям. Анда атыгъызны бла тукъум атыгъызны, сора къайсы элге связь тартыргъа кереклисин кёргюзтюрге тийишлиди. 

Госуслуги порталда аслам халкъ сайлагъан 1800 элни тизмеси боллукъду. Алагъа интернет келир жыл келликди. Къабарты-Малкъар республикада жыл сайын юч элге тартыргъа боллукъдула аллай связьны. Айырыуланы эсеплерин а быйыл 26 декабрьде туура этерикдиле.

Эсге сала айтсакъ, буруннгу жыл къол кётюрюуде бизни республикада юч эл тюшгенди ол тизмеге: Матвеевский, Ново-Вознесенский эм Придорожное. Быйылны ахырына дери алада 4G интернет ишлеп башларыкъды.

Улбашланы Мурат.