Анга Элбрус эм Чегем районланы школларыны  аскер-патриот классларыны окъуучулары къатышхандыла: битеу да бирге 13 къауум. Быйыл «Зарницада» кеслерини къарыуларын  140 жаш бла къыз сынагъандыла. 

Алай бла школчула АК-74  автоматдан атдыргъандыла,  аны ким терк чачарыгъын эм жыярыгъын кёргендиле, радиациядан, химиялы эм биология уудан  къоруулагъан кийимлени ким терк киеди деп да эришгендиле. Дагъыда ала тарыхны къалай билгенлерин да кёргюзтгендиле. 

Алай бла бу жол  Тырныауузда Совет Союзну Жигити В.Кузнецов атлы школну командасы барысындан да айырмалы болгъанды. Экинчи жерге Терс-Къолну школчулары чыкъгъандыла, Тырныауузну 3-чю номерли школуну окъуучулары уа ючюнчюле болгъандыла.   

Эришиуле алты сагъатдан кёп баргъандыла. Сабийлеге уа  чекчиле аш-суу къурагъандыла: аланы  керти «аскерчи как» бла сыйлагъандыла.

 «Зарница» оюнла совет кезиуде тёрели эришиуле болгъандыла. 2008 жылда уа РФ-ни ФСБ-сыны Чекчи управлениясыны къуллукъчулары Элбрус районну оноучулары бла бирге оюнланы жангыртыргъа келишгендиле. Ол кезиуден бери  оюнла районда тёрелиге бурулгъандыла, чекчиле уа аланы окъутуу-юйретиу керекле бла жалчытадыла.

Тикаланы Фатима хазырлагъанды.