«Единая Россия» энчи операциягъа мобилизация бла къатышхан инсанлагъа социал гарантияла тохташдырыу жаны бла башламчылыкъла этгенди. Сёз урунуу эм финанс себепликлени юслеринден барады.   

Партия мобилизация бла аскерге чакъырылгъанлагъа кредит каникулла тохташдырыу жаны бла башламчылыкъла этгенди. Дагъыда Урунуу кодексге тюзетиуле кийирип, фронтха кетгенлени ишчи жерлерин сакълауну юсюнден законопроектни хазырлагъанды.

Партияны Генсоветини таматасы Андрей Турчак билдиргенича, алай бла аскерчи энчи операциягъа чакъырылгъынчы ишлеген жерге къайтыргъа, алгъан къуллугъун андан ары толтурургъа боллукъду.

 - Андан сора да, биз этген башламчылыкъла къабыл кёрюлселе, ала къуллукъ этген кезиу урунуу стажгъа да кийирилликди, къыралны иелигинде болмагъан пенсия фондладан  тёлеуле эмда жашау болумларын игилендириуге эркинликле да сакъланырыкъдыла,-дегенди Андрей  Турчак.

Аны бла бирге къошакъ гарантияла аскерчилени юйюрлерине да тохташдырыладыла. «Биз хазырлагъан тюзетиуле жууукъ кезиуде сюзюллюкдюле. Быллай гарантияла граждан къуллукъчулагъа да сакъланырыкъдыла»,-дегенди Турчак.

Кредит каникулланы юсюнден законну проектине тийишлиликде, мобилизациягъа тюшген инсаннга ай сайын тёлеулени ёлчемин азайтыу жаны бла мадарла кийирилликдиле. Аскерчи энчи операцияны кезиуюнде ёлтюрюлсе уа, кредит андан толусунлай кетериледи. «Биз жигитлерибизни юйюрлери ючюн къайгъырыргъа борчлубуз. Юйюрлери да кредитден эркин этилликдиле»,-деп къошханды ол.

Банкла мобилизациягъа тюшгенлеге кредит каникулла тохташдырыргъа унамасала, партия ол жаны бла башламчылыкъла этерге да хазырды. Аскерчилени юйюрлери  кредитлени заманында тёлеялмагъанларына къайгъырмазча керекдиле, деп чертгенди ол.

Партия, андан сора да, жашау журт-коммунал тёлеулени заманында бералмай, борч жыйылгъан кезиуде тазирлени салмазгъа деген башламчылыкъны да этгенди. Сёз аскерге мобилизация эмда кеслерини ыразылыкълары бла баргъанланы юслеринденди. Ол жаны бла законопроектни «Единая Россияны» фракциясыны депутаты Александр Якубовский этгенди, ол премьер-министр Михаил Мишустинни къараууна берилгенди.

Башха башламчылыкълары да бардыла партияны. Ол санда энчи операциягъа къатышхан студентлеге академиялы солуу тохташдырыуну,  атышыуланы кезиуюнде саулугъуна ауур заран салынып, сакъатлыкъ тохташдырылгъанлагъа хакъсыз социал болушлукъну, фронтда жоюлгъан аскерчилени сабийлерине школда эки кере хакъсыз аш-суу бериуню юслеринден эм башхала.

«Единая Россияны» Къырал Думада фракциясыны депутатлары кеслерини ыразылыкълары бла энчи операциягъа къатышыргъа сюйгенлерини юслеринден заявленияла келип башлагъанларын да билдирилгенди. Аланы жууукъ кезиуде Къоруулау министерство тинтип, тийишли оноула чыгъарлыкъды. Фронтха барыргъа сюйгенин билдиргенлени арасында саулукъ сакълау комитетни башчысы   Дмитрий Хубезов, къоруулау жаны бла комитетни башчысыны орунбасары Дмитрий Саблин, юйюрню, тиширыуланы эм сабийлени соруулары жаны бла комитетни башчысыны экинчиси    Сергей Сокол эм башхала бардыла.

- Депутатла кеслерини мандатлары бла хайырланып, жашланы къазауатха ашырадыла дегенле терсдиле. Аны жамауатны бузаргъа итиннгенле айтадыла. Бюгюн миллетчилени тохтатмасакъ, ала тамбла бизни юйлерибизге  келликдиле. Барыбыз да бир болсакъ, жамауат къыралыбызны башчысыны тёгерегине бириксе, бандеровчуланы хорларыгъыбызгъа ишексизме!,-дегенди депутат   Дмитрий Хубезов.

Тикаланы Фатима хазырлагъанды.