МАМЫРЫГЪЭМ ЗИ ГЪАЩIЭР ЩIЭЗЫТАХЭР ЯГУ КЪАГЪЭКIЫЖ

Жэпуэгъуэм и 13-м Къэбэрдей-Балъкъэрым ягу къыщагъэкIыжащ хабзэхъумэ органхэм я лэжьакIуэхэу зи къалэн зыгъэзащIэу ди лъахэм мамырыгъэрэ зэгурыIуэныгъэрэ илъыным зи гъащIэр щIэзытахэр. Налшык щекIуэкIащ абы теухуа  фэеплъ пэкIу.

ПэкIур щекIуэкIым къыхагъэщащ, а  махуэм, илъэс 17 ипэкIэ, IэщэкIэ зэщIэузэда бзаджащIэхэр Къэбэрдей-Балъкъэрым и щыхьэрым къызэрытеуар.   Хабзэхъумэхэм я лIыгъэм  къызэтригъэувыIащ щIэпхъаджащIэхэм я хьэгъэщагъэр.  Ди республикэм и мамырыгъэмрэ шынагъуэншагъэмрэ яхъумэу  абы   щыхэкIуэдащ  хабзэхъумэ  IэнатIэхэм я лэжьакIуэ 37-рэ. 

Республикэм и мамырыгъэм зи гъащIэр щхьэузыхь хуэзыщIа хабзэмхъумэхэм    я фэеплъым пщIэ хуащIу,  Хэку зауэшхуэм и илъэсхэм,  я пщэрылъ къалэнхэр ягъэзащIэу хэкIуэда лIыхъужьхэм   я   фэеплъым  деж щызэхуэсахэм яхэтт КъБР-м и Iэтащхьэ    КIуэкIуэ Казбек, КъБР-м и Iэтащхьэм и  Администрцэм  и унафэщI   Къуэдзокъуэ Мухьэмэд, КъБР-м экономикэмрэ жылагъуэ шынагъуэншагъэмкIэ и советым и секретарь     Тату Къазбэч, къэрал кIуэцI IуэхухэмкIэ министру КъБР-м щыIэ полицэм и генерал-лейтенант Павлов Василий,  републикэм и хабзэхъумэ IэнатIэхэм я унафэщIхэр, КъБР-м щыIэ МВД-м  дэлажьэ Жылагъуэ советым и лIыкIуэ Мэкъушэ Руслан, ветеранхэр, жылагъуэ, дин IуэхущIапIэхэм я лIыкIуэхэр,   хэкIуэда хабзэхъумэхэм я Iыхьлыхэмрэ благъэхэмрэ.

Фэеплъ пэкIум щыщIидзэм,   Совет Союзым и ЛIыхъужь Калюжный Н.Г. и цIэр зезыхьэ  Налшык къалэ курыт еджапIэм     и  кадет классхэм щIэсхэм   мамырыгъэр яхъумэу   тхэкIыжахэм я фэеплъым и дамыгъэу шар хужь гъэпщахэр яутIыпщащ.

 Къызэхуэсахэм защыхуигъазэм  КIуэкIуэ Казбек жиIащ:

- Илъэс 17 мэхъу пщыгъупщэ, яхуэбгъэгъу мыхъун, дэтхэнэ зыми ди гур зыгъэуз  а щIэпхъаджагъэр къызэрыхъурэ.  Ди щхьэр яхудогъэщхъ а щIэщхъу гуауэм хэкIуэдахэм я фэеплъым, ди республикэр террористхэм ящызыхъумахэм я лIыгъэмрэ быдагъэмрэ пщIэшхуэ яхудощI. Ди зэхуэдэ къалэнщ  террористхэм  ерыщу пэщIэтыныр. Си фIэщ мэхъу,  властым и IуэхущIапIэхэр, хабзэхъумэ IэнатIэхэр, зэрыщыту жылагъуэр, зэкъуэувэмэ, а бзаджагъэм дызэрытекIуэнур, ди щIыналъэм мамырыгъэр  щытепщэу зэрыщытынур,- жиIащ КъБР-м и Iэтащхьэм.

 Къэрал кIуэцI IуэхухэмкIэ министру КъБР-м щыIэ полицэм и генерал-лейтенант Павлов Василий къыщыпсалъэм къыхигъэщащ   хабзэхъумэ органхэм я лэжьакIуэхэу хэкIуэдахэм  я щIыхькIэ    мемориалхэмрэ фэеплъхэмрэ зэрагъэувыр, лIыхъужьхэм я цIэхэр школхэмрэ уэрамхэмрэ зэрыфIащар, а псомкIи республикэм и унафэщIхэр къазэрыдэIэпыкъур.

- Я лэжэгъухэмрэ ныбжьэгъухэмрэ  лIыхъужьхэм я фэеплъ нэхур ноби я гум щахъумэ.  КъБР-м щыIэ МВД-м и унафэщIхэм  я нэIэ трагъэтщ хэкIуэдахэм я  Iыхьлыхэмрэ благъэхэмрэ. Нобэ ди къэралым щыпсэухэм я мамырыгъэмрэ шынагъуэншагъэмрэ узыгъэпIейтейщ.  Мы  зэман гугъум дэ псори лъэщу дыщытыпхъэщ,  хабзэмрэ ди цIыхухэм  я шынагъуэншагъэмрэ  тхъумэн папщIэ.   ди къарур зэкъуэдгъэувэмэщ ди Хэкур щытхъумэфынур.  Дэ тщыгъущэн хуейкъым дызэкъуэтмэ дызэрылъэщыр,- къыхигъэщащ Павлов Василий.

Апхуэдэуи къызэухэсахэм захуигъэзащ КъБР-м и Жлыагъуэ палатэм щыщ Къарей Расул.      

  КъБР-м и Муслъымэнхэм я дин IуэхущIапIэм и тхьэмадэ Дзасэжь Хьэзрэталийрэ  благочиннэ Бобылев Валентинрэ хэкIуэдахэм тхьэ яхуелъэIуащ.  

ПэкIум хэтахэр хэкIуэда хабзэхъумэхэм  я фэеплъым пщIэ хуащIу дакъикъэкIэ щымащ.    Абыхэм     удз гъэгъахэр  тралъхьащ  Хэку зауэшхуэм и илъэсхэм, мамыр зэманым зи къалэн зыгъэзащIэу хэкIуэда хабзэхъумэхэм я фэеплъым.  

                                                                       

УЭРДОКЪУЭ Женя.

Поделиться:

ЧИТАТЬ ТАКЖЕ:

28.03.2024 - 09:03

АДЫГЭХЭМ Я КЪЕЖЬАПIЭР

   ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ.

28.03.2024 - 09:03

КАСПИЙСК ЩЫЗОХЬЭЗОХУЭ

Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм.

27.03.2024 - 13:58

БИЙМ ЗЫ ГУПУ ПЭЩIИГЪЭУВАТ

Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I

27.03.2024 - 12:25

ДУНЕЙПСО ЗЭХЬЭЗЭХУЭР Я ПЛЪАПIЭУ

Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх

27.03.2024 - 09:03

СИ ЖЭНЭТ

(ГъащIэ теплъэгъуэ)