КъМР-ни Башчысы Казбек Коков ыйыкъ сайын къурулуш ишле бла байламлы соруулагъа къарагъан штабны жыйылыуун бардыргъанды. Жыйылыуну ишине КъМР-ни Правительствосуну Председатели Мусукланы Алий, аны биринчи орунбасары Муаед Кунижев, КъМР-ни къурулуш эм жашау журт коммунал-мюлк министри Алим Бербеков, КъМР-ни транспорт эм жол мюлк министри Аслан Дышеков, КъМР-ни жарыкъландырыу эм илму министри Анзор Езаов, КъМР-ни саулукъ сакълау министри Рустам Калибатов, КъМР-ни маданият министри Мухадин Кумахов, КъМР-ни спорт министрини орунбасары Аналаны Аслан къатышхандыла.

Анда республикада миллет проектле, федерал эм регионал программала къалай бардырылгъанларына къарагъандыла. Артыкъда бек суу бла жалчытыу соруугъа уллу эс бурулгъанды. Къабарты-Малкъарда быйыл эллени суу бла жалчытыуну игилендириу бла байламлы жыйырмагъа жууукъ  инфраструктура объект ишлене турады. Къурулуш ишле «Журтла эм   шахарланы тапландырыу» деген миллет проектни чеклеринде тамамланадыла. Ол объектле Нальчикни жангы жашау журтла ишлене тургъан районунда, Куба, Сармаково, Быллым, Нартан, Лячинкъая, Тёбен Къуркъужин, Огъары Къуркъужин, Анзорей,  Эски Черек, Экинчи Лескен, Терек шахарда эм «Къара-Суу-Бабугент-Къашхатау» деген суу баргъан ызында орналыпдыла.

Россей Федерацияны «Эл жерлени комплексли айнытыу» федерал программаны чеклеринде  Солдатский станицада бла Пролетарский элде скважиналаны ишлеп бошагъандыла. Быйылгъы жылда республикалы бюджетден Кёнделенни бир кесегинде суу баргъан быргъыла алышындырыллыкъдыла эм Дыгулыбгейде канализация коллектор ишленирикди.

 Жаш тёлюню чыгъармачылыкъ юйюнде къурулуш  ишле бардырыладыла, ол уллу объектге саналады. Аны уллулугъу 20 минг квадрат метрден асламды, ишле белгиленнген графикге кёре бардырыладыла. Республиканы тогъуз поликлиника учреждениясында тынгылы ремонт этилип бошала турады, аланы тёртюсю Нальчикде, къалгъанлары Зольск, Терк, Черек, Бахсан эм Урван районлада орналыпдыла. Жууукъ заманда Аушигерде амбулатория хайырланыргъа берилликди. Андан сора да, Нальчикни поликлиникаларында эм онкология диспансерде, Элбрусну участка больницасында, Куба элни амбулаториясында къурулуш ишле тохтамайдыла. Жылны аягъына Нарткъалада, Кубада эм Прохладныйде битеу да 1785 жери болгъан мектеплени къурулушлары бошаллыкъдыла. Дагъыда Нальчикде башы жабылгъан жалгъан бузу болгъан мекямны къурулушу бардырыла турады, деп билдиргендиле республиканы оноучусуну пресс-службасындан.

 Бизни корр.