Къабарты-Малкъар Республиканы Башчысы Казбек Коков муниципал районланы эм шахар округланы таматалары бла ишчи кенгеш бардыргъанды. Анга КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, КъМР-ни Правительствосуну Председателини орунбасары Марат Хубиев, КъМР-ни Башчысыны эм Правительствосуну ишлерин бардырыу управляющий Азаматгерий Ашхотов къошулгъандыла.
Кюнню повесткасында – РФ-ни Президенти Владимир Путинни жарым мобилизацияны юсюнден Указын толтуруу соруула. Аскер къуллукъгъа чакъырылгъан инсанланы юйюрлерине болушлукъ этиу амалла, аскерчилени аскер керекле бла жалчытыуда болушлукъ тапдырыу соруулагъа къаралгъанды.
Эсигизге салайыкъ, озгъан ыйыкъда Къабарты-Малкъардан мобилизация этилген биринчи къауум аскер борчларын толтурлукъ жерлерине жиберилгенди.
КъМР-ни Башчысы билдиргеннге кёре, мобилизация этилген инсанлагъа федерал даражада болушлукъдан сора да регионда къошакъ халлы социал гарантияла берилликдиле. Тийишли Указ республиканы оноучусуну официал халлы сайтында басмаланнганды, анга кёре хар мобилизация этилгеннге ай сайын 25 минг сом да берилликди. Жаралы болса, 100-ден 300 минг сомгъа дери, жаралы болгъаныны ауурлугъуна кёре, эмда аскерчи ауушса – миллион сом.
Къабарты-Малкъарда аскер къуллукъгъа чакъырылгъанланы юйюрлерине болушлукъ этиу жумушланы къурау иш андан ары бардырылады.
– Ачыкъ айтыргъа тийишлиди, хар зат терк халда болгъанды, аны ючюн кёпле, жолгъа къурала, кеслерини ахчаларын жойгъандыла. Алгъын белгиленнгенича, ол къоранчла къайтарыллыкъдыла. Андан сора да, республиканы предприниматель къаууму ол магъаналы бирлешген ишге юлюшюн къошаргъа излегенди, – дегенди Казбек Коков.
Республиканы Башчысы муниципал къуралыуланы таматаларына мобилизация этилген инсанланы юйюрлери бла тири ишлерге, аланы сорууларына терк жууапла берирге, болушлукъ изленнгенлеге энчи эс бурургъа буюргъанды, деп билдиреди республиканы оноучусуну пресс-службасы.
