ФокIадэр къызэрысу, школакIуэхэм зэрызахуэпэн хуей щIыкIэм теухуа зэдауэхэм  я бжыгъэр мэбагъуэ. Илъэс къэс я диным хуэфэщэну захуэпэну зыхуамыдэ муслъымэн  хъыджэбз цIыкIухэм я цIэхэр зэхыдох. Зэзэмызэ а макъхэм къахозэрыхь школым ныкъуэхуапэу, е «узижагъуэн зи махуэ гуэру» хуэпауэ  екIуэлIэну хуейхэм я хъыбар.

Тюмень къалэм дэт еджапIэ №88-м щеджэ дагъыстэн хъыджэбз цIыкIур  фокIадэм и 1-м  школым  щIагъэхьакъым. IэлъэщI  хужь  птелъу  дерсыр къыбгурыIуэныр дзыхьщIыгъуэджэу къыщыхъуа къыщIэкIынщ директор Головчак Еленэ. Нэм къыщIэуэр, дауи,  сабийр Кавказым зэрыщыщымрэ муслъымэн дин зэрызэрихьэмрэт. Къэхъуар хэIущIыIу зыщIар  хъыджэбз цIыкIум и анэрщ. Iэуэлъауэшхуэ къызэрыхъейуэ, Тюмень областым и губернаторым и къуэдзэ Райдер Александр хъыджэбз цIыкIум и адэ Давудов Ибрэхьимрэ псори къэзыгъэхъея школ унафэщIымрэ  захуигъазэри, мамырыгъэр трагъэкIуащ.

«УщIэгузэвэн зыри щыIэкъым. Хъыджэбз цIыкIум IэлъэщI телъу еджакIуэ кIуэну зэримурадым директорыр нэхъ пасэу щыгъуазэ ищIын хуеяуэ аркъудейщ», - жиIащ Райдер Александр къэхъукъащIэм щытепсэлъыхьыжым.

«ЕмыкIу къэтхьащ, - жиIащ хъыджэбз цIыкIум и адэ Давудов Ибрэхьими. – Сэ  сщIакъым  унафэщIхэм хъыбар  егъэщIэн  хуейуэ.  КхъыIэ, фигу Iей къысхуивмыгъэлъ».

Головчак Елени IуагъэкIыну хуейтэкъым. «Сэ сабий псори си зэхуэдэщ, - жиIащ абы. – ЕджакIуэхэм щыгъын зэщхь щIыщрагъэтIагъэм щхьэусыгъуэ имыIэу щыткъым. Унагъуэхэм я хэхъуэхэр зэхуэдэкъым. Сабийхэр еджакIуэ къызэрыкIуэну щыгъыныр къыхэзыхыр адэ-анэхэм я советырщ, иужькIэ администрацэр кIэлъыплъу аращ абыхэм уставым ирагъэува унафэм».

Къэрал Думэм и депутат Хамзаев СулътIан егъэджэныгъэмкIэ министр Кравцов Сергей курыт еджапIэхэм щIэс муслъымэн хъыджэбз цIыкIухэм IэлъэщI ятелъыну зэрыхуитым теухуа унафэ пыухыкIа пхагъэкIын лъэIукIэ зыхуигъэзащ фокIадэм и 14-м.

«Мы къэхъукъащIэмкIэ Iуэхум кIэ етту, егъэджакIуэу ди къэралым ис псоми къагурыгъэIуапхъэу къызолъытэ школыр щIэныгъэм нэмыщI, диныр щIэгъэкъуэнышхуэ зыхуэхъу гъэсэныгъэми и хэщIапIэу зэрыщытыр, - щыжиIащ депутатым Думэм и зэхуэсым. - Тюмень дэт школым къыщыхъуар къаугъэ къэгъэхъеипIэ мыхъу щIыкIэ, унафэ пыухыкIа щIын хуейщ. Сабийм игурэ и щхьэрэ зэрызэтрахуам ищIыIужкIэ, Тхьэр и фIэщ зэрыхъур даIыгъыным и пIэкIэ, къуаншагъэ гуэр илэжьам хуэдэу къыфIагъэщIащ».

 Мы  къэхъукъащIэм  ебгъапщэ  хъунущ   Екатеринбург къалэм а махуэ дыдэм щекIуэкIахэр. ЕджапIэ №92-м и 10-нэ классым щеджэ хъыджэбз цIыкIур фокIадэм и 1-м… и  ныбэр къыщIэщу школым къэкIуащ.  «Мыр топикщ,  щIагъщIэлъкъым! – къагуригъэIуащ хъыджэбзышхуэм и зыхуэпэкIэм и купщIэр. – ПлIэ щыстIэгъэну сыхуейтэкъыми, щыстIэгъакъым!»

«Сэ сыщыунафэщIкIэ, - жиIащ еджапIэм и директор Калинин Максим, - хъыджэбз цIыкIум сыт и лъэныкъуэкIи сыкъыщхьэщыжын хуейщ. Дэ сабийм и гум демыуэну дыхэтщ. Абы къыгурыIуэжакIэщ махуэшхуэ пшыхь къызэрымыкIуар. ДяпэкIэ апхуэдэу ищIэжынукъым, фIы дыдэуи йоджэ».

А махуэ дыдэм гимназие №108-м щеджэ, 7-нэ классым щIэс щIалэ цIыкIу еджапIэм къекIуэлIащ… цIыхубз щыгъынкIэ. Ари къыщыхъуар Екатеринбургщ. Зи гугъу тщIа сабиитIри зыми щIихужакъым, игъэукIытакъым, ирагъэгъэзэжакъым. Къэрал псом хэIущIыIу щыхъуа нэужьщ зыгуэр жраIэн зэрыхуейр ягу къыщыкIар.

 Щхьэж зыхуейм ирегупсыс.

ЧЭРИМ Марианнэ.