Билимни кюнюне, Терроризмге къажау кюрешде бир ниетлиликни кюнюне эмда Республиканы къыраллыгъыны кюнюне жораланнган ишлени кезиулеринде террорчулукъдан сакъланырча мадарла этиуню юсюнден сёлешиннгенди Терроризмге къажау комиссияны бла Оператив штабны бирге бардырылгъан жыйылыуларында. Аны КъМР-ни Башчысы Казбек Коков бардыргъанды.

Кенгешге КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, РФ-ни Президентини СКФО-да толу эркинликли келечисини аппаратыны КъМР-де баш федерал инспектору Тимур Макоев, тийишли министерстволаны, муниципал администрацияланы, право низамны сакълаучу органларыны оноучу къуллукъчулары да къатышхандыла.

Казбек Коков келир кезиу магъаналы битеуроссей эмда республикалы ишледен бай боллугъун эсге салгъанды. Ол жумушлагъа республиканы жамауаты, Россейни тюрлю-тюрлю регионларындан келлик къонакъла да кёп санда къатышырыкъдыла, деп чертилгенди.

Жыйылыуда дагъыда къууанчла ётерик объектледе къоркъуусузлукъну жалчытыуну мадарлары сюзюлгендиле. Кюч структураланы, толтуруучу власть органланы бла муниципалитетлени келечилери алада ол жаны бла не зат этилгенини юсюнден билдиргендиле. Казбек Коков ведомстволаны араларында бирге ишлеуню излеген мадарла бла байламлы талай буйрукъ бергенди.