«Динамо» обществону 100-жыллыгъына аталып, Нальчикде гитче-футболдан регионла аралы эришиу бардырылгъанды. Талай кюнню ичинде Сабий стадионда право низамны сакълаучу органланы Къабарты-Малкъарда, Къарачай-Черкесде, Чеченде, Шимал Осетия-Аланияда бёлюмлеринден 10 команда эришгендиле. Оюнла эки кесекге бёлюннгендиле, алгъа командала бир бирлери бла тюбешгендиле, ызы бла олимпиада амал бла сынашхандыла. Эсеплеге кёре, биринчи жерни Осетияны къаууму алгъанды, экинчи жерге УФСИН-ни Къабарты-Малкъарда командасы, ючюнчюге да – МВД-ны бизни республикада келечилери чыкъгъандыла.

– Къайсы оюн эм къыйын болгъанын айталмайма, тюбешиуле барысы да тынч тюйюл эдиле. Хар команда да къаты кюрешгенди, хорларгъа барыбыз да сюйгенбиз, алай бу жол бизни насыбыбыз тутханды, - дегенди биринчи жерни алгъан команданы капитаны Чермен Гиголаев.

Хорлагъанланы «Динамону» таматасы Анатолий Гулевский, Ара советини келечилери, КъМР-де ич ишлени министри полицияны генерал-лейтенанты Василий Павлов алгъышлагъандыла. «Обществону регион бёлюмю юбилейге аталгъан байрам ишлени андан ары бардырады. Футбол а спортну эм ариу, зауукълу тюрлюлеринден бириди. Сиз, керти да, ахшы оюнла кёргюзтгенсиз. Футболну даражасын кётюргенигиз ючюн ыразылыгъымы билдиреме, сизден юлгю алып кёп жашчыкъла топ бла ойнап башларларыкъларына ийнанама», – дегенди Анатолий Гулевский.

Сыйлы къонакъла айырмалы спортчуланы энчи алгъышлагъандыла. Алай бла эм иги вратарьгъа - Амирхан Нахушев (КъМР-де УФСИН), эм иги къоруулаучугъа – Павел Кузьминов, эм иги чабыуул этиучюге – Борис Персаев (экиси да Осетиядан) саналгъандыла. Эм иги бомбардир Кантемир Хагабанов (КъМР-де МВД-ны бёлюмю) болгъанды, Рахим Гонов (КъМР-де УФСИН) а хорламгъа итиниулюгю ючюн белгиленнгенди, деп билдиредиле «Динамо» обществону регион бёлюмюню пресс-службасындан.