Ипщэ федеральнэ округым зэи щымыIа Iуэхугъуэу Ростов къалэм и онкоцентрым и дохутырхэм щIыфэм иIэ сэкъатыр микрохирургие IэмалкIэ ягъэхъуж.

ЩIыфэм къеуэлIа лышхыр зэрагъэхъуж операцэ лIэужьыгъуэщIэр япэ дыдэу Урысейм и ипщэ округым ща­щIыу аращ. Апхуэдэ микрохирургием и фIыгъэкIэ лышхыр щIыфэм трагъэкъэбзыкIым и мызакъуэу, уIэгъэр псынщIэу, лъэужьыншэу мэгъущыж. Къыхэгъэщыпхъэщ, мы операцэ лIэужьыгъуэмкIэ кърагъэж щIыфэр, лыр, лъынтхуэр езы сымаджэм и щIыфэ узыншэм ­кърахри, трабзэж.

Микрохирургиер щрагъэкIуэкIкIэ къагъэсэбэп иужьрей микроскопхэр. Абы хуиту уегъэлъагъу узыр зыпкърыт налъэхэмрэ узыншэхэмрэ. Аращи, щIыфэм лейуэ хэIэбэркъым, лажьэ зимыIэ лъынтхуэхэр Iисраф ящIыркъым.

- Иужьрей Iэмэпсымэхэр къэдгъэсэбэпу микрохирургием и IэмалыщIэр дгъэунэхуащ иджыблагъэ. Абы и фIыгъэкIэ операцэр щрагъэкIуэкIа махуэ дыдэм уIэгъэм щIыфэ, лъынтхуэ, лы узыншэ трабзэж, щIэх дыди мэкIыж, операцэ нэужьым цIыхум къефыкI узыр къеныкъуэкъуркъым, уеблэмэ узыххэкъым. КъищынэмыщIауэ, уIэгъэ иIауи имыIауи къыпхуэмыщIэу, хогъуэщэж, - жеIэ Лышх узыфэхэмкIэ медицинэ къэхутакIуэ IуэхущIапIэм и унафэщI, РАН-м и академик Кит Олег.

НобэкIэ апхуэдэ операцэ цIыхуищым щыхуащIащ Ростов. Япэу ар зыгъэунэхуар Ростов областым щыщ, илъэс 70 зи ныбжь бзылъхугъэщ. Ар иджыри сабий цIынэу и лъа­къуэр мафIэм исри, и лъэгуажьэ зэрытыпIэм фэбжьышхуэ ­игъуэтат, къыщикIухькIэ узу, щIыфэр зэпытхъыу, уэтэпс къижу. Ауэрэ зэпытхъа и щIыфэр лышх хъужат. Узыфэ шынагъуэм иубыда фэр трагъэжащ, и щIыбым щIыфэ узыншэ кърахри, лъакъуэм трабзэжащ дохутырхэм.

- Лышхыр тедгъэжа нэужь, сантиметр 27х12 хъу лы цIынэр зыгуэркIэ зэхуэщIыжын хуейт. Абы папщIэ, бзылъхугъэм и щIыбым лы узыншэрэ лъынтхуэрэ къидгъэжри, и лъакъуэм тедбзэжащ, лъынтхуэхэри зэпыддэжащ. Операцэр фIы дыдэу зэфIэкIащ, сымаджэм етIуа­нэ махуэм хуиту къикIухьырт. Абы зэрыжиIамкIэ, къигъэщIа илъэс 70-м къриубыдэу япэ дыдэ и лъакъуэр ­къемыузу зекIуэу арат, - къыхигъэщащ онколог Аушевэ Татьянэ.

ЕтIуанэу апхуэдэ операцэ зыхуащIар Къэбэрдей-Балъкъэрым щыщ цIыхухъущ. Абыи и лъакъуэм щIыпIэ-щIэпIэкIэ зыхиубгъуауэ лышх иIэт. Япэми хуэдэу, сэкъат­ зыгъуэта щIыфэр трагъэжри, и щIыбым къраха лы узыншэр трабзэжащ.

Ещанэу микрохирургие зыхуащIар Ростов областым щыщ бзылъхугъэщ. Абы и лъакъуэм и фэр лышхым иубыдри, лымрэ къупщхьэмрэ хыхьэжат. Хирургхэм къыхэбэгыкIар кърагъэжри, бзылъхугъэм и адрей лъа­къуэ узыншэм къраха лыр, псантхуэхэр, лъынтхуэхэр ха­дэжащ. КъищынэмыщIауэ, и ныбэм къытрагъэжа щIы­фэмрэ лымрэ къагъэсэбэпащ.

- Апхуэдэ сымаджэхэр лышхым къыIэщIахын папщIэ нэхъапэм и лъакъуэр пахынут. Иджы микрохирургием и фIыгъэкIэ апхуэдэ щыIэжынукъым, - жиIащ Аушевэм.

Гу лъытапхъэщи, микрохирургиер пщIэншэу щрагъэкIуэкI Ростов щыIэ IуэхущIапIэм.