КъМР-ни Табийгъат байлыкъла эм экология министерствосундан билдиргенлерича, озгъан шабат кюн,  иссиликге да къарамай, битеуреспубликалы субботникге он мингнге жууукъ адам чыкъгъанды.  Анга  министерстволаны  бла ведомстволаны, предприятияланы  бла  организацияланы келечилеринден тышында, элледен волонтёрла да къатышхандыла.

Эсге сала айтсакъ, эллени санитар болумларын игилендирир хыйсап бла къуралгъан экология акция  регионну Правительствосуну бегимин толтурууну  чеклеринде барады. 

Тийишли ведомствода, алгъадан  чыгъарылгъан  эсеплени келтире, субботник баргъан кюн 70 тоннадан аслам зыбыр кир-кипчик жыйылгъанын айтхандыла. Бир-бир элледе алыкъа тёгерек-башны тазалау бла байламлы ишле тохтамагъанлары себепли ахыр эсеплеге  танг къошуллугъу баямды.