«Машук-2022» Битеуроссей жаш тёлю форумда «Биз барыбыз да Россейбиз» деген стратегиялы сессия ётгенди. Аны Жаш тёлюню федерал агентствосу «Халкъла кёпдюле – Ата журт а бирди» деген проект бла бирге къурагъандыла. Анга къатышханла миллет энчиликни, Россейни халкъларыны бирге байлашханларыны, Шимал Кавказда тюрлю-тюрлю миллетлени бла динлени келечилерини бирге жарашып жашагъанларыны аламат юлгюлерин сюзгендиле.

Сессия бир ненча кесекге юлешиннгенди. Хар биринде машукчула, къауум-къауум болуп, миллетле аралы халланы игилендириу жаны бла гитче проектле бла амалла жарашдыргъандыла. Экспертле да кеслерини оюмларын айтхандыла. Чечен Республиканы Илмула академиясыны президенти, жазыучу эмда публицист Джамбулат Умаров инсанлыкъ бирчалыкъны къалай ангылагъанын билдиргенди.

– Мени сартын, ол бушууну, къууанчны да бирча сезиудю, аллай кезиуледе бирге болууду. Башха тюрлю болур амалы жокъду. Бизни деменгили къыралыбыз ючюн барыбыз да къууана, ата журтлуларыбызгъа билеклик эте, хар эллибиз, хар россейли ючюн  къайгъыра билирге керекбиз,-дегенди ол.

Сессияны экинчи кесегинде анга къатышханла шёндюгю дунияда, уллу къоркъууланы заманында, инсанлыкъ бирчалыкъны магъанасын сюзгендиле.

- Ана тилин, ёз тарыхын билмеу  бизни кёп миллетли эмда кёп динли къыралыбызны миллет къоркъуусузлугъуна къоркъуу салгъаны баямды, - дегенди Жаш тёлюде инсанлыкъ сезимле къурау, терроризмге бла  экстремизмге къажау координация араны директору Анна Багдасарова.

Ючюнчю кесегинде тюрлю-тюрлю миллетли сабийлени бла жаш адамланы араларында шуёхлукъну кючлеуню амаллары сюзюлгендиле. 

–Хар ким кесини тамырларын билирге, халкъы бла ёхтемленирге, ана тилинде сёлеширге керек болгъаны баямды. Алай аны бла бирге  сабийге гитчелигинден окъуна биз, башха-башха болгъанлыкъгъа, барыбыз да россейлиле болгъаныбызны ангылатыуну магъанасы бек уллуду. Биз деменгили къыралны къурар, бизни Россейибизни айнытыр ючюн бирге окъуйбуз,  билим алабыз, ишде кётюрюле барабыз, сюймекликге жолугъабыз, сабийлеге жашау беребиз, -деген оюмгъа келгендиле ахырында сессиягъа къатышханлы.