Москвада «Путешествуй!» деген экинчи турист форум къуралгъанды, анда СКФО-ну битеу субъектлери «Кавказ. РФ» къурагъан майданда кёргюзтюлгендиле. Форумгъа къатышханла мастер-класслагъа, презентациялагъа къарагъандыла, россейли регионланы бла жууукъдагъы тыш къыралланы солуу къурауда онглары бла шагъырейлленнгендиле.

Республиканы делегациясына башчылыкъны курортла эм туризм министр Мурат Шогенцуков этгенди. Ишчи сессияланы кезиуюнде регионлагъа инвестициялагъа келирча этиуню, миллет маршрутланы къурауну юсюнден айтылгъанды. Министерствону келечилери автотуризмни айнытыуну юсюнден оюмларын билдиргендиле. Ызы бла регионла аралы маршрутну жарашдырыуну юсюнден юч жанлы келишимге – Ставрополь край + Къабарты-Малкъар + Шимал Осетия-Алания – къол салыннгандыла.

Кёрмючде Къабарты-Малкъарны турист, маданият энчиликлери, аш-азыкълары кёргюзтюлгендиле. Мокъаланы Дина ийлеген кийиз, Залина Шишманны накъут-налмас затлары, Мадина Саральпны адыг миллет кийимлери къонакълагъа сейир кёрюннгендиле.  Залина Умыхова къолдан усталыкъланы кёргюзтгенди, Абхазияны сыйлы артисти  Зубер Еуаз а бурун макъамланы эшитдиргенди. Къонакъланы региондан келтирилген сют, эт, татлы ашарыкъла бла сыйлагъандыла. Кавказны аш этиучюлерини ассоциацияларыны президенти Чеченланы Бисо бла ассоциацияны келечиси Мичукаланы Мадина хычинле этерге юйретгендиле.