КъМР-ни Башчысы Казбек Коков кезиулю «муниципал сагъатны» бардыргъанды. Анда  сёз миллет проектле къалай толтурулгъанларыны, иш хакъны кётюрюуню, юйлеге жылыу берилген кезиуге хазырланыуну, элледе бла шахарлада жашагъанланы суу бла жалчытыуну юслеринден баргъанды. Андан сора да, Къабарты-Малкъарны 100-жыллыгъына эмда жангы окъуу жылгъа хазырланыу не халда болгъанына  къаралгъанды.

 Республикада 12 миллет проектге кёре ишле бардырыладыла. Школлагъа ремонт этиуге энчи эс бурулады. Суу бла жалчытыу бла байламлы кемчиликле да аз-аз кетериле барадыла. Бюгюнлюкде Россейни Правительствосуну хайырындан Бахсанда, Нальчикде, Элбрус районда уллу инфраструктура проектле, башха муниципалитетледе уа ууагъыракъ жумушла  тамамланыладыла.

Августда бла сентябрьде регионну юбилейине жораланнган  ишле бютюн асламдыла. Ала республикада жашагъанлагъа бла аны къонакъларына тап келирча мадарла этиледиле. Казбек Коков байрам жумушланы тийишлисича бардырыугъа эмда къоркъуусузлукъну жалчытыугъа энчи эс бурургъа кереклисин эсгертгенди.

20 августда республикалы субботникни кенг халда ётдюрюрге белгиленеди. Анга битеу министерствола бла ведомствола, муниципалитетлени администрациялары, предприятияла бла организацияла да къатышырыкъдыла.