Россейни МЧС-ини регионда Баш управлениясыны Къыйын болумлагъа къарау арасында лейтенантланы – министерствону вузларын бошагъанланы – анда иш къалай къуралгъаны бла шагъырейлендиргендиле. Жаш офицерле дежурный смена къаллай борчланы толтургъанын билгендиле, управление органланы низамларына къарагъандыла, специалистлени ишлерини энчиликлерине, къыйын болум чыкъгъанда не этерге кереклисине тюшюннгендиле.
Тюбешиу араны бёлюмюню башчысы Азрет Ивановну учрежденияны борчларыны юсюнден билдириуюнден башланнганды. Ол къыйын болумла чыгъаргъа къоркъуу болгъаныны юсюнден алгъадан билиуню, ол санда социал магъаналы объектледе да, мониторинг системаланы юслеринден айтханды.
Андан сора офицерлеге ЦУКС-ну оператив къауумуну автомобилин кёргюзтгендиле. Азрет Иванов белгилегенича, бу машина оператив къауумну къыйын болум чыкъгъан жерге жетдирирге, анда халгъа багъа бичерге эм тюшген хатаны кетериуде ишлени къурауда хайырланылады. Автомобильде республиканы къалайындан да связьны къайсы тюрлюсюн да тохташдырырча оборудование барды, оператив къауум а автоном халда талай кюнню ишлеяллыкъды.
Эсгертиу: МЧС-ни вузларын тауусхандан сора республикагъа 4 офицер келгендиле, стажировканы ётгенден сора ала ведомствону бёлюмлеринде ишлеп башларыкъдыла.
