КъМР-ни маданият министри Мухадин Кумахов бла республиканы миллетлени ишлери эмда жамауат проектле жаны бла министрини орунбасары Гергъокъланы Джамбулат Къабарты-Малкъарны келечилерини къаууму бла аскер махтаулукъну жерлерине автомобильле бла барыугъа къатышхандыла. Ол жолоучулукъ Уллу Ата журт урушну кезиуюнде 1942 жылны июль айында Ростов областьны Мартыновка районун немисли-фашист аскерледен къоруулар ючюн баргъан сермешледе 115-чи Къабарты-Малкъар атлы дивизия этген жигитликге жораланнганды.

Автопробег башланырны аллында Уллу Мартыновкада Махтаулукъну эсгертмесини къатында митинг болгъанды, ызы бла анга къатышханла районну краеведение музейин жокълагъандыла.

Жолгъа чыкъгъан автомобильчиле урушну жигитлери асыралгъан жерледе: Лысый курганда, Степной, Московский, Новониколаевка хуторлада болгъандыла. Жолоучулукъ Уллу Мартыновкада Шуёхлукъну аллеясында бошалгъанды. Бу аллея 2014 жылда къуралгъанды. Аны 60 кёк назы, 60 туя эмда 25 акъ терек жасайдыла.

Мында эки эсгертме таш да орнатылгъандыла. Аладан бири Къабарты-Малкъар Республиканы бла Мартыновка районну араларында шуёхлукъну намысына, экинчиси уа Россейни аскерини тюрлю-тюрлю жерледе баргъан аскер къаугъалада жоюлгъан аскерчилерини хурметлерине салыннгандыла. Терекчикле бла эсгертме ташла уа кеси заманында Къабарты-Малкъардан келтирилген эдиле.