КъБР-м и Iэтащхьэ КIуэкIуэ Казбек Адыгэ Республикэр илъэси 100 зэрырикъуамкIэ абы и Iэтащхьэ КъумпIыл Мурат ехъуэхъуащ.
«Адыгэ Республикэм нобэ и илъэси 100 ныбжьыр егъэлъапIэ. 1922 гъэм бадзэуэгъуэм и 22-м РСФСР-м хэту щIыналъэм къэралыгъуэ зэрыщызэфIэувам абы и тхыдэри, щыпсэу лъэпкъхэри гъуэгуанэ махуэ тригъэувауэ щытащ.
ГъащIэм и дэтхэнэ лъэныкъуэми ехъулIэныгъэшхуэхэр щызригъэгъуэтащ Адыгэ Республикэм блэкIа илъэси 100-м. ЩIыналъэм щыпсэухэм я зэхуаку дэлъ зэкъуэтыныгъэм, ахэр жэуаплыныгъэкIэ лэжьыгъэм зэрыбгъэдэтым, езыхэри зэрызэрыIыгъым и фIыгъэкIэ, Адыгэ Республикэр щIыналъэ хъуэпсэгъуэ хъуащ. Гъунэ зимыIэ Урысеишхуэм ар налкъутым ещхьу къыхолыдыкI. ЩIыналъэм хэщI имыIэу щахъумэ адэжьхэм къыхуагъэна хъугъуэфIыгъуэхэр, нэхъыжьхэм къащIэна хабзэжьхэмрэ щэнхабзэмрэ нэхъри зрагъэубгъу, - дыкъыщоджэ КIуэкIуэ Казбек и хъуэхъум. - Адыгэ Республикэм дяпэкIи къикIуэт имыщIэу зиужьынущ, ди Хэкум и къэкIуэнум хэлъхьэныгъэшхуэ хуищIу. Гурэ псэкIэ сохъуэхъу республикэм и Iэтащхьэ КъумпIыл Мурат Къэралбий и къуэми ди къуэш республикэм щыщ унагъуэ къэси насып яIэну, ефIакIуэу, заузэщIу псэуну».