РФ-ни Цифралы министерствосу МВД бла бирге автомашиналаны сатыу-алыу жаны бла электрон сервис жарашдыргъандыла. Аны «Госуслуги» порталда табаргъа боллукъду. Аны хайырланнган инсан автомобильни сатыу келишимни толусунлай онлайн халда жарашдырыргъа боллукъду. Юридический жаны бла алып къарагъанда, ол келишимни кючю къагъыт документча аллай кючю боллукъду.

Сервисни таплыгъы

Электрон келишим этиу къошакъ халда берилген сервисди. Кеси да транспорт средствону къырал эсепге салгъанда жарашдырылыргъа боллукъду. Онлайн-келишим гражданланы заманларын, къыйынларын аярыкъ амалды. Нек дегенде, эки жаны да кёргюзтюрюк информация анда аллындан окъуна барды, аны себепли документлени толтургъанда халат жиберир онг боллукъ тюйюлдю. Дагъыда сатыу-алыу къагъытны формасын излерге керекмейди – ол сервисде барды. Энтта да бир игиси – документни бетден-бетге тюбеше турмай толтурургъа боллукъду. Анга уа жаланда он минут керекди.

Информацияны тюзлюгюне сервис жууаплыды. Машина розыскде тура неда аны сатаргъа чек салыннган эсе – ол аны да кёргюзтюрюкдю, аллай транспорт средствону сатыу-алыу келишимин этерик тюйюлдю.

Бу сервисни хайырланыргъа сюйгенлеге талай излем барды. Эм биринчиден алыучугъа, сатыучугъа да 18 жыл толургъа тийишлиди. Ала кеслери да ол порталда регистрацияны ётерге борчлудула. Ызы бла экилерини да телефонларында «Госключ» деген программа болургъа керекди.

Ол излемле толтурулгъан эселе ызы бла быллай атламла этиледиле:

Келишимни биринчиден сатыучу жарашдырып башлайды. Кимден къаллай автомашина аллыгъын да кёргюзтеди.
Система ол машинаны юсюнден хар нени да тинтеди, информацияны да алады.
Сатыучу бла алыучу «Госключ» программагъа кирип, келишимге къол саладыла.
Алыучу он кюнню ичинде машинаны къырал эсепге салады. Аны заявлениясын, электрон келишимни да система жарашдырады.
Транспорт средствону эсепге салырча, алыучуну аты бла ОСАГО полис болургъа керекди. Машинагъа тёрт жылдан кёп бола эсе – диагностика карта да керекди.

Айтылгъаныча, келишимге «Госключ» программада къол салынады. Ол юридический жаны бла магъаналы электрон документлени алай хазырларгъа онг берген приложенияды. Аны «Госуслуги» порталда эсепде тургъанла хайырланыргъа боллукъдула. Толуракъ информация бу сайтда табарыкъсыз: https://www.gosuslugi.ru/goskey .

Улбашланы Мурат хазырлагъанды.