ДОХУТЫРЩ ИКIИ УСАКIУЭЩ

ПщыукI Латмир I975 гъэм Къулъкъужын къуажэм къыщалъхуащ. Латмир и япэ тхылъыр езыр иджыри школым щIэсу дунейм къытехьащ. Тхылъым фIищащ «КъуэкIыпIэ пшэплъ». I992 гъэм курыт еджапIэр къиухри, Латмир щIэтIысхьащ КъБКъУ-м, ауэ литературэракъым IэщIагъэ ищIыну къыхихар – дохутырырщ. ПщыукIыр ТхакIуэхэм я союзым хэтщ.
 
Медицинэ факультетым щеджэми, щIалэм усэ тхыныр IэщIыб ищIакъым, хэбгъэзыхьмэ, ар публицистикэми дихьэхащ. Университетым щеджэнымрэ «Адыгэ псалъэ» газетым щылэжьэнымрэ Латмир зы зэманкIэ зэдихьащ. ПщыукIыр тхэным хуэIэижь дохутыр щIалэт, абы гъэщIэгъуэну игъэхьэзырырт «Узыншагъэ» напэкIуэцIыр.
I997 гъэм къыдэкIащ Латмир и етIуанэ усэ тхылъыр, «Си гум и IэпапIэ» зыфIищар. Дохутыру щылажьэ диспансерымрэ «Адыгэ псалъэм» щиIэ къалэнхэмрэ ПщыукIым зыкIи къытемыхьэлъэу зэдихьырт, абы и щыхьэтщ и ещанэ усэ тхылъыр - «Губгъуэ зэрыджэ» фIэщыгъэр зиIэр.
Латмир и дохутыр IэщIагъэм щIэныгъэкIэ пищэну зыкъом щIауэ и мурадти, абы къарууэ иIэр иритын папщIэ 2003 гъэм и кIэм «Адыгэ псалъэм» IукIыжащ. «Газетыр хуабжьу сэбэп къысхуэхъуащ, си адыгэбзэр ипсыхьащ». – жиIэрейщ Латмир.
Илъэс зыбжанэкIэ адыгэ газетым щылэжьа усакIуэм, дохутыр щIалэм и цIыху щIыкIэм, хьэл-щэн дахэм теухуауэ Iэджэ пхужыIэнут, ауэ псалъэ лей гуэр хуэмыныкъуэу къысщохъу Латмир. Ар нэхъыфIу къызэрыфцIыхунур и усэхэрщ: ахэр къабзэщ, гупсысэ куукIэ гъэнщIащ.
Тхьэхущынэ Ланэ.
 
***
Губжьыр зэщIыдокъуэж,
ЗэщIыдокъуэж гужьгъэжьыр.
Хъунукъым дыхущIегъуэж,
ДыкъыщыкIуакIэ хьэщIэу.
 
Уафэр къыдотIэпIыж,
Къыдобзыхьыжыр щIылъэр.
Сытым и сэбэпыж
КъимыкIыкIыну жылэм?
 
ЩIыдагъэхынур сыт
ГупыкIыгъуей пэш уардэм?
Псэр хуэныкъуэжкъым зы,
КIэрыхьэжамэ аддэ…
 
***
Дауэ уи фIэщ сщIыжыну
Си псэр уи жэщ хъумакIуэу?
Си псэм и жэщ гъы макъыр
Дауэ уи фIэщ сщIыжын?
Пкъыр игъэтхытхыу щIыIэщ
Гуэлым къыхиху акъужьыр,
Мазэу си шыпхъу нэхъыжьым
Дауэ сынопцIыжын?
Махуэр яхьыж зыщIыпIэ,
Жэщыр яхьыж зыщIыпIэ,
ГъащIэр си щыпэлъагъуу
Дауэ уи фIэщ сщIыжын?
Псэм къысхуиIуатэр хьэлъэщ…
Схуэмыхъуэжа си хьэлыр…
ГъащIэм щIэщыгъуэ хэлъу
Дауэ си фIэщ сщIыжын?
 
***
АфIэкI сумыбгынэ, афIэкI успымыкI,
АфIэкI къысхуумыхь хъыбар гуауэ.
Сэ гъащIэм иджыри зыгуэр хызощIыкI,
Си нитIыр уэсэпсым добауэ.
 
Кхъухьлъатэм зыкъещIыр нэхъ лъахъшэ, нэхъ хуэм,
Нэхъ Iэсэ зыкъещIыр зэманым…
Си усэм и псынэр дэкIуадэми къуэм –
АфIэкI пхузиIэжкъым гукъанэ.
 
АфIэкI закъуэныгъэр фэеплъ къысхуумыщI,
Сэ сощIэ дакъикъэм и уасэр…
Жэщ щIыIэ жейхуэлIэм зы налъи хэмыщI,
Уи куэщIым илъ си щхьэр мэуназэ.
 
***
Уафэр хэпщIыкIыу къелъэхъшэхащ,
ЩыжумыIэжым си фIыцIэ,
Къуршым пшэ гуартэр къыщхьэдэхащ,
Псэм къепыджауэрэ фIыцIэу…
ЩыIэкъым уэщхьу сызыгъэфIэн,
СызыгъэфIыни щымыIэ.
ЩыIэр фадэбжьэ сезыгъэфэнщ,
Псэм къебгъэрыкIуэмэ щIыIэр.

Поделиться:

ЧИТАТЬ ТАКЖЕ:

29.03.2024 - 08:57

ХЬЭЩIЭХЭМ ДЫКЪЫХАГЪАЩIЭ

Урысей Ипщэмрэ Кавказ Ищхъэрэмрэ регби 7-мкIэ пашэныгъэр къыщыхьыным теухуа зэхьэзэхуэ иджыблагъэ Налшык къалэм щекIуэкIащ.

29.03.2024 - 08:56

ГУАПЭУ ЯГУ КЪАГЪЭКIЫЖ

КъБР-м щIыхь зиIэ и журналист, Урысей Федерацэм, Къэбэрдей-Балъкъэрым щэнхабзэмкIэ щIыхь зиIэ я лэжьакIуэ, жылагъуэ лэжьакIуэ, «Советская молодёжь» газетым и редактор нэхъыщхьэу щыта Къардэн Мухьэм

29.03.2024 - 08:56

ХАДЭХЭКI ФIЭIУГЪЭХЭМКIЭ ДЫПАШЭЩ

Пхъэщхьэмыщхьэмрэ хадэхэкIымрэ къыхащIыкI консерву Кавказ Ищхъэрэм къыщыщIагъэкIым и процент 90-р Къэбэрдей-Балъкъэрым къылъос.

28.03.2024 - 09:03

АДЫГЭХЭМ Я КЪЕЖЬАПIЭР

   ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ.

28.03.2024 - 09:03

КАСПИЙСК ЩЫЗОХЬЭЗОХУЭ

Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм.