Нальчикде Келишиулюкню майданында «Юнармия ZA Мир без фашизма. Север-Юг 2022» битеуроссей патриот автомаршны келечилери уллу патриот акция къурагъандыла. Аны кезиуюнде Хорламны байрагъыны эм уллу копиясы эм 300-метрлик Георгий лента жайылгъандыла. Бу ишге республиканы битеу шахарларындан бла районларындан «Юнармия» бла «РШД» къымылдауланы 600-ге жууукъ келечиси къатышхандыла. Акция Донбассда къуллукъ этген россейли аскерчилеге аталгъанды.
Автомарш «Юнармия» сабий-жаш тёлю аскер-патриот битеукъырал къымылдауну баш штабыны, аны Красноярск крайда бёлюмюню эм ветеранланы «Аскер къарындашлыкъ» организацияларыны башламчылыкълары бла бешинчи кере ётдюрюледи. Аны чегинде Хорламны белгилерин къыралны субъектлери бла элтедиле. Аланы муратлары Уллу Ата журт урушда туугъан жерибизни немис-фашист ууучлаучуладан азатлап, келир тёлюлеге бюгюннгю мамыр жашауну саугъалагъан ата-бабаларыбызгъа хурмет этгенлерин кёргюзтюудю.
Жыйылгъанланы республиканы жаш тёлюню ишлери жаны бла министри Азамат Люев алгъышлагъанды. «Биз бюгюн Нальчикде, аскер махтаулукъну шахарында, энчи операциягъа къатышхан уланларыбызгъа бла къызларыбызгъа аталгъан, уллу къыралыбызны гражданларын бирикдирген акциягъа келгенбиз. Жаш тёлю тюзлюкню излейди, сегиз жылны Донбассда жашагъанла азап чегип тургъанларыны юсюнден запад пропаганда, асламлы информация органла нек тынгылагъанларыны юсюнден, мамыр адамланы къутхарыргъа оноу этилгенинде санкцияла, къажаулулукъ нек башланнганыны сылтауун сорады. Акцияны белгилери Георгий лента бла Хорламны байрагъыдыла, ала узакъ 1945 жылда душман ууатылгъанына шагъатлыкъ этедиле. Шёндю да фашизмнин ниетлерин жаяргъа кюрешгенле бардыла. Алай мен бюгюн биз барыбыз да бирге, Баш Главнокомандующийге, аскерибизге билеклик эте, аны хорларыгъыбызгъа ишексизме», - дегенди ол.
Тюбешиу Сталинградда къазауатны 80-жыллыгъыны аллында ётдюрюледи. Адам улу аллай къанлы сермешни билмегенди, алай совет аскерчиле къачмагъандыла, жаудан къоркъмагъандыла. «Юнармияны» Красноярск крайда бёлюмюню башчысы Денис Побилат алгъышлауунда былай айтханды: «Заман бизни сайлагъанды.
Бюгюн Россей биягъы къорууланыугъа, къозгъала тургъан фашизмге къажау сюелгенди. Ол бусагъатда къарындаш халкъны къоркъууда къоялмагъанды, аны ючюн Баш Главнокомандующий Владимир Путин Донбассны халкъын къорууларгъа чакъыргъанды. Автомарш Россейни шахарлары бла барады, Чеченде Грозныйде бошаллыкъды.
Ол бирге къыралыбызны битеу халкъларын, православияны тутханланы бла муслийманланы бирикдиреди. Биз барыбыз да биргебиз, Президент, мамырлыкъ, фашизм болмагъан дуния ючюнбюз». Автомаршха къатышхан – Красноярск крайны сыйлы устазы Лидия Коршунова, Къабарты-Малкъарны келечилери Уллу Ата журт урушда этген жигитликлерин, республикадан кёп айтхылыкъ адам чыкъгъанын, ала барысы да къыралыбызны ёхтемлиги болгъанларын черте, жыйылгъанлагъа ыразылыгъын билдиргенди. Ол регионнга автомаршны белгисин, шагъатлыкъ къагъытны, Хорламны Маршалы Георгий Жуковну бюстун саугъалагъанды.
Алгъышлау сёзлерин КъМР-ни Урунууну, Сауутланнган кючлени эм право низамны сакълаучу органланы ветеранларыны жамауат организацияларыны таматасы Мухамед Шихабахов, «Аскер къарындашлыкъ» организацияны регион бёлюмюню таматасы Владимир Абаноков, «Юнармияны» жер-жерли бёлюмюню активисти Байсыланы Арнела айтхандыла. Мухамед Хабасович жаш адамла патриот мероприятияланы бардыргъанлары тамата тёлюню къууандыргъанын, ёхтемлик бергенин чертгенди: «Бизни ата-бабаларыбыз, фашизмни хорлап, битеу дуниягъа жигитликлерин кёргюзтгендиле, бюгюн да ала бизге кишиликни, Ата журтха кертичиликни, анга къуллукъ этиуню юлгюсюдюле». Владимир Кадзукович да Хорламны Знамясы халкъланы жигитликлерини белгиси болгъанын чертгенди. Къыралыбыз жангыдан неонацизмге тюбегенди, бусагъатда да аны хорларыгъызгъа жюрекден ийнанама, дегенди.
Алгъышлауладан сора Знамя бла Георгий лентаны ачхандыла, ала саулайда майданны алгъандыла. Ол Уллу Хорламдан жангы хорламлагъа жолну, Сибирьден башлап Кавказгъа дери миллетлени шуёхлукъларыны, алгъа таукел барыуну, къарындашлыкъны белгиси болгъанды. Жаш аскерчиле, аланы толкъунлача ойната, уллу «Z» харфха кёре тизилгендиле. Тёлюлени, миллетлени да байлагъан акция бардырылгъан сагъатны ичинде патриот жырла, «Ура» деген чакъырыула эшитилгенлей тургъандыла. Ахырында уа майданда болгъанла бирге жыйылып суратха тюшгендиле.
Кульчаланы Зульфия.
