Россейни Президентини Шимал-Кавказ федерал округда толу эркинликли келечиси Юрий Чайка Къабарты-Малкъаргъа иш бла келгенинде, КъМР-ни Башчысы Казбек Коков бла тюбешгенди. Ушакъны кезиуюнде сёз республиканы юбилейин байрамлауну, миллет проектле жашауда къалай бардырылгъанларыны, регионда жамауат-политика эмда социал-экономика болумну юслеринден баргъанды.
Юрий Чайка жаш тёлю бла ишлеуню, жаш адамланы иш бла жалчытыуну, ол санда жангы билимли кадрланы регион проектлеге къошууну, артыкъда магъаналыгъа санагъанды.
Казбек Коков а 2021 жылда къоркъуулу аурууладан бакъгъан госпитальлада багъылгъан коронавирус саусузлагъа этилген медицина болушлукъ ючюн Къабарты-Малкъаргъа Россейни Правительствосуну буйругъу бла 800 миллион сом берилгенини юсюнден билдиргенди. Тийишли бегимге орта кюн РФ-ни Правительствосуну Председатели Михаил Мишустин къол салгъанды.
Полпред Шимал-Кавказ федерал округну регионларыны экономика айныуларыны юлгюлерин сюзюуню эсеплери бла шагъырейлендиргенди. Россейни Правительствосу 1,7 триллион сомдан асламгъа 35 проектни къабыл кёргенди. Ол ахча толусунлай округну айнытыугъа къоратыллыкъды.
Тюбешиуден сора Юрий Чайка Нальчикде биринчи кере бардырылгъан «Моя провинция» деген ХХIII битеуроссей фестивальны ачылыууна къатышханды. «Экспертлени бир къаууму биз шартланы журналистикасындан оюмланы журналистикасына кёчгенбиз дейдиле. Бир жаны бла ол кертиди. Алай эсе уа, бу жыйылыуну магъанасы бютюн ёседи. Нек дегенде, анга Ата журтубузну тюрлю-тюрлю жерлеринден келген профессионал журналистле къатышадыла. Башхача айтханда, ала Россей къалай эмда не бла жашагъанын толуракъ эмда кёп тюрлю жаны бла ачыкълагъан адамла жыйылгъандыла»,- деп чертгенди полпред.
Фестивальгъа Россейни Журналистлерини таматасыны орунбасары Алексей Вишневецкий, Телерадиобериулени бардырыучуланы миллет ассоциациясыны башчысы Александр Широких, «Московская правда» газетни баш редакторуну орунбасары Татьяна Кузьмина, Ара телевиденияны дикторлары Евгений Кочергин бла Алла Данько къатышхандыла.
Форумну кезиуюнде регион телевиденияны бла басманы келечилери бир бирге сынауларын билдиргендиле, жангы амалла бла шагъырейленнгендиле, СМИ-ни усталарыны сейир мастер-классларына къатышхандыла. Андан сора да, журналистле жюриге регионлада тауушлукъ жерлени, адамларыны да юслеринден репортажларын, фильмлерин бла статьяларын кёргюзтгендиле.
Фестивальны программасына уа Къабарты-Малкъарны ариу жерлерине жолоучулукъла эмда республиканы халкъларыны адет-тёрелери бла шагъырейлениу да киргендиле.
Казбек Коков къырал башчыны келечисине байрамны жокълагъаны ючюн жюрек ыразылыгъын билдиргенди, фестивальгъа къатышханланы алгъышлагъанды. «Шёндюгю дунияда басма органланы эмда энчи журналистлени магъаналары айтып-айтмазча уллуду. Ахыр ишле анга шагъатлыкъ этедиле. Регион басма, бизни къыралны къыйыр жерлериндеги басма жамауатны бирлигин, адет-тёрелени сакълаугъа эмда инсанланы патриот ниетлерин чыныкъдырыугъа уллу къыйын салады»,-дегенди ол.
КъМР-ни Башчысыны бла
Правительствосуну
пресс-службасы.
