Къабарты-Малкъар Республика къуралгъанлы 100-жыллыгъын байрамлауну аллында Нальчик «Моя провинция» ХХIII битеуроссей фестивальгъа къонакъбайлыкъ этгенди. Бери къыралыбызны 40 регионундан журналистле келгендиле. Аны ачылыуунда РФ-ни Президентини СКФО-да толу эркинликли келечиси Юрий Чайка бла КъМР-ни Башчысы Казбек Коков сёлешгендиле. Ала шёндюгю заманда журналистлени магъаналары бютюн уллу болгъанларын чертгендиле. Регионланы жашауларын, адамларын бютюн толу ачыкъларгъа кереклисин эсгертгендиле.
Фестивальгъа къатышханла, аны къурагъанла да бизни республиканы къонакъбайлыгъын, табийгъатыбызны ариулугъун, аны адамларыны халаллыкъларын, туризм жаны бла республиканы уллу онглары болгъанларын айырып айтхандыла. Журналистле репортажла этер ючюн Нальчикни, Минги тауну тийресини, Чегем чучхурланы эмда Чирик кёллени да кёре баргъандыла эмда кеслерини репортажларында ол къысха жолоучулукъларыны юслеринден оюмларын ачыкълагъандыла.
Бир кюнню уа фестивальгъа къатышханла республикалы газетлени ишлери бла шагъырейлениуге жоралагъандыла. Басманы юйюнде коллегаларына «КБР-Медиа» ГКУ-ну келечилери, жер-жерли изданияланы баш редакторлары бла журналистлери тюбегендиле. Ушакъны кезиуюнде кёп затны юсюнден сёлешиннгенди – газетге жазылгъанланы санын къалай кёбейтирге боллукъду, басма эмда сеть изданияланы бир бирге хата салмай къалай бла айнытса игиди…
«Советская молодёжь» газетни конференц-залында уа жаш журналистлени «Акулы пера» деген школуну онунчу къауумуну эсеплери чыгъарылгъандыла. Аны бошагъанланы алгъышлагъандыла эмда РФ-ни Журналистлерини союзуну председателини орунбасары Алексей Вишневецкий бла КъМР-ни Журналистлерини союзуну таматасыны къуллугъун толтургъан Шауаланы Разият алагъа сертификатла бергендиле.
Юсюпланы Галина.
Суратны Элина
Караева алгъанды.