Къабарты-Малкъарны Жамауат палатасында «КъМР-де экология билим бериуню эм экология жарыкъландырыуну юсюнден» закон къалай толтурулгъаны сюзюлгенди.
Жыйылыуну ача, палатаны табийгъат байлыкъланы хайырланыу, къудуретни сакълау эм экология жаны бла комиссиясыны башчысы Юрий Колесников экология бла билим бериу жаны бла къырал политика тийишлисича толтурулгъанын белгилегенди. Сабий садлада методистле бла педагогла экология программаланы жарашдыргъандыла эм гитчелени алагъа кёре юйретедиле, экология экскурсияла бла байрамла бардырыладыла. Мектепледе уа экология билим бериу окъуу программагъа кёре тамамланады.
Табийгъат байлыкъла эм экология министрни орунбасары Валерий Гриневич бу соруугъа къырал дажада уллу магъана берилгенин, аны мураты экология жаны бла къоркъуусуз айнытыуну жалчытыу эм жамауатны эсин тюрлендириу, къудуретге сакълыкъгъа юйретиу болгъанын белгилегенди.
- Республиканы битеу мектеплеринде «Экология юйретиу» бёлюм кийирилгенди, анга кёре класс сагъатла бла дерсден тышында мероприятияла ётдюрюледиле. «Жашил алам», «Экология бла краеведение», «Мени юйюмю экологиясы», «Жарыкъландырыу экология», «Жер – бизни юйюбюздю» деген кружокла ишлейдиле. 5-11 классланы окъуучуларыны къатышыулары бла «Къаты кир-кипчикни жыйышдырыуда экология культураны ёсдюрюу» темагъа «тёгерек столла» къураладыла. Гитче класслада уа юйретиу оюн халда бардырылады. Мектепледе «Макулатураны бер – терекни сакъла!» аты бла акция ётгенди», – дегенди ол.
Министерство, кесини жанындан, жарыкъландырыу ишге тири къатышады, табийгъатны сакълау бла байламлы жумушланы толтуруугъа, волонтёрствогъа себеплик этеди.
«Диалог на равных» федерал проектге тийишлиликде ведомствону келечилери окъуучула бла тюбешгендиле, анда республикада табийгъат байлыкъла къалай хайырланылгъанларыны, къудуретни къоруулауну юсюнден айтылгъанды, хар мероприятияны кезиуюнде волонтёрланы къаууму къуралады, бусагъатда экоотрядха 300-ден аслам адам киреди. Сууланы сакълауну юсюнден федерал проектни чегинде «Россейни сууу» («Огъурлу ишлени жагъасы») акция 2014 жылдан бери къуралады, жылдан-жылгъа анга къатышханланы саны ёсе барады. Алай бла быйыл республикада Нальчик, Чегем, Черек, Черек-Хулам, Малка, Баксан, Урвань, Терек, Аргудан, Урух, Лескен, Шалушка эм Золка суула эм аланы жагъалары тазаланнгандыла. Доброволецле Чирик кёлледе бла Чегем чучхурлада – магъаналы табийгъат объектледе – субботник бардырылгъанды, Этоко элден окъуучула да келип, Тамбукан кёлню жагъалары да ариуланнгандыла.
Республикабызны жамауаты, «Агъач салыуну битеуроссей кюню», «Агъач, жаша!», «Агъачны от тюшюуден сакъла» деген акциялагъа тири къатыша, бу проблемагъа уллу кёллю болмагъанын кёргюзтгенди. Адамла агъачланы сакълауну проблемасына аслам эс бурурча, ведомство ангылатыу иш бла да кюрешеди. Аны бла байламлы асламлы информация органлада 53 материал басмаланнганды, районлада 47 ушакъ бла лекция бардырылгъандыла, эсгертиулери бла 5300 къагъыт юлешиннгенди, «Агъачны от тюшюуден сакълагъыз» видеоролик кёргюзтюлгенди.
Россейни Жамауат палатасыны келечиси Заурби Нахушев, тийишли программаланы да хазырлап, тохтаусуз экология билим бериу системаны къайтарыргъа эсгертиу этгенди. Ол аллергияланы къозгъагъан битимлени кетериуню проблемасын да кётюргенди. Аны ючюн Заурби Ахмедович жер-жерли самоуправление органланы кеслерини районларында энчи программала жарашдырыргъа чакъыргъанды. Сёз ючюн, «борщевик Сосновского» бек къоркъуулу, терк жайылгъан хансладанды, адамны саулугъуна уллу заран да салыргъа боллукъду. Ол республикабызда битмезча этерге керекди, дегенди общественник.
Жыйылыугъа къатышханла барысы да экология билим бериуню жаш тёлюню тин жаны бла юйретиуге борчлу халда къошаргъа кереклисин чертгендиле. Ол мурат бла халкъны экология кёз къарамын тохташдырыргъа, аны ючюн а ишни школладан ба сабий садладан башларгъа тийишлисин чертгендиле, деп билдиредиле Жамауат палатаны пресс-службасындан.
Кульчаланы Зульфия.
