ИЛМУ ДОКЛАДЛА, СЕЙИР ЖОЛОУЧУЛУКЪЛА

Минги тауну тийресинде «Вольфрам» къонакъ юйде  «Элбрусда сёлешиу майдан-2022» деген тёрели регионла аралы   конференция ётгенди. Бу жол ол «Адам эмда технологияла: шёндюгю заманны бек иги школун излеу» деген ат бла бардырылгъанды. Кеси да  устазлагъа, сабий садлада юйретиучюлеге, бийик эмда энчи  окъуу юйледе преподавательлеге  болушлукъгъа къуралгъанды.  

Жыйылыугъа  КъМР-ни  жарыкъландырыу эмда  илму министерствосуну,  Элбрус районну билим бериу управлениясыны, школланы, сабий садланы келечилери, алимле, экспертле да къатышхандыла. Минги тауну этегинде «Сёлешиу майданнга»  Дагъыстандан, Ингушетиядан, Север-Осетия Аланиядан, Чечен Республикадан, Москвадан, Астраханьдан, Санкт-Петербургдан, Екатеренбургдан, Дондагъы Ростовдан, Къабарты-Малкъардан, Россейни кёп башха регионларындан да жюзден аслам адам келгенди.

Форумчуланы Элбрус районну администрациясыны башчысы Сотталаны Къурман  алгъышлагъанды. Ол КъМР-ни Жарыкъландырыу эмда  илму  министерствосуна, энчи аны таматасы Анзор Езаовха бу форумну къураргъа себеплик этгенлери ючюн ыспас этгенди. Быллай жыйылыуланы магъанасы уллу болгъанын да чертгенди.        

Конференцияны кезиуюнде билим бериуде  жетишимлени, кемчиликлени  юслеринден да  айтылгъанды, окъутууну бютюн къыйматлы этиуню амаллары сюзюлгендиле, алчы сынаула, юлгюле келтирилгендиле. Докладла бла Москвадан  РФ-ни Президентини саугъасыны лауреаты, профессор Владимир Просвиркин,  «Атлам» деген билим бериу программаланы арасыны башчысы  Наталья  Шадрина,  профессор  Людмила Петерсон, КъМР-ден   физика-математика илмуланы кандидаты, профессор  Валерий Ревелис,  Мухамед Лихов,  КъМР-ни сыйлы устазы  Газаланы Аслижан эмда башхала да сёлешгендиле.  

Билим бериу программала, мастер-классла, сёлешиуле, Элбрус районда болгъан музейлеге барыу,  Минги  тауну   4.400 метр бийиклигине  ёрлеу, Гара сууланы таласына эм башха тамашалыкъ жерлеге барыу,  художниклени кёрмючлерин кёрюу – битеу ол ишле  тёрт кюннге сыйыннгандыла. Устазланы араларында назму жазаргъа фахмулула да усталыкъларын аямагъандыла.

-Биз тынгылы ишлегенбиз, проблемаланы, жангы амалланы, сынауланы юслеринден да айтханбыз. Сёзсюз, мындан ары   да быллай жыйылыулагъа  бютюн  кёп педагог келирине ийнанама. Хар замандача, бу жол да  иш иги къуралгъанды, хайырлылыгъын да кёргюзтгенди, – дегенди Валерий Ревелис тюбешиуню ахырында.           

– Жыйылыуда бийик окъуу юйледе  преподавательлени ишлеринде  магъаналы болгъан кёп соруулагъа жууапла табылгъандыла. Ала уа бизни ишибизге себеплик этериклерине ишексизме.

Мында, Минги тауну этегинде, бардырылыучу конференциягъа жылдан-жылгъа кёпден-кёп адам  къатышханын, алай бла бу къымылдау айный баргъанын, кесини билимин, усталыгъын ёсдюрюрге сюйгенлени саны  бютюн аслам болгъанларын  да белгилеп айтырчады», – дегенди Дагъыстанны  педагогика  университетини доценти, ана тиллени айнытыу  бла кюрешген  алим Фатимат  Асельдер.

 

Холаланы Марзият.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.