СЮЙМЕКЛИКЛЕРИ ЭМ КЕРТИЧИЛИКЛЕРИ БЛА БИРГЕ ГИРТЧИЛИКЛЕРИН ДА КЁРГЮЗТГЕНДИЛЕ

Бу кюнледе Нальчик шахарны «Гладиатор» спорт комплексинде «Ата, ана, мен – спорт юйюр» деген фестиваль ётгенди. Ол юйюрню, сюймекликни эм кертичиликни кюнюне аталгъанды. Аны Къабарты-Малкъар республикада Ич ишлени министерствосу къурагъанды. Ары право низамны сакълаучу органланы келечилери юйюрлери бла къатышхандыла.

Эришиуле Россей Федерацияны эм Къабарты-Малкъар Республиканы гимнлери бла ачылгъанды. Андан ары КъМР-де ич ишлени министри, полицияны генерал-майору Василий Павлов келгенлени Юйюрню, сюймекликни эм кертичиликни кюню бла эм Къурман байрам бла алгъышлагъанды.

– Ишлери къыстау болгъанлары бла байламлы бизни къуллукъчуларыбыз, жарсыугъа, юйюрлери бла солургъа заман табалмай къаладыла. Биз бюгюн ол болумну бир кесек тюзетирге, юйдегилеригизге, сабийлеригизге эс бурлугъугъузну сюебиз, - дегенди министр.

Алгъышлагъанланы санында МВД-ни регион бёлюмюнде жамауат советини башчысы Руслан Макушев, КъМР-ни ич ишле органланы эм ич аскерлени ветеранларыны советини председатели Пихов Муаед да болгъандыла.

Андан сора зауукълу эришиуле башланнгандыла, алагъа ведомствону бёлюмлеринде онжети юйюрден къуралгъан команда кеслерин беш кезиуден къуралгъан эришиуледе сынагъандыла. Биринчи «Танышлыкъ» болгъанды. Анда къысха заманны ичинде уллу къагъытда кесинги юйюрюнгю, девизинги терк жазып, артда аны юсюнден хапар айтыргъа керек эди. Андан ары спорт жаны бла тёрт эстафета бардырылгъанды. Аланы ичинде бадминтон эм теннис ракетка бла, клюшка бла да топну керекли жерине дери учуруп, артха къайтарыргъа керек эди, дагъыда топ бла кеглялагъа уруп, битеу аудурургъа керек эди, скакалка бла эм топ бла терк секирип. Ахыр кезиуде уа ата бла ана бир бири ызындан машок бла секирип, артда уа сабийни машокга салып, аны бла бирге финишге жетерге керек эдиле. Къайсы команда сабийин жукълаучу машокга жангылмай терк элтип жатдырса, ол хорлагъанды.

Эриширге итиниулери уллу болгъанлыкъгъа, хар юйюр бир бирине болушургъа кюрешген эди.

Ол кюн энчи борчланы толтуруучу «Гром» отрядны аскерчилери келгенлеге кеслерини усталыкъларын кёргюзтгендиле. Андан тышында бу отрядда хайырланылгъан энчи техника бла сауутну кёрюрге боллукъ эди. Къырал автоинспекцияны келечилери жолда къоркъуусузлукъну кёрмючюн къурагъандыла. Ары келген сабийле бла ата-анала жолда жюрюуню жорукълары бла шагъырейленнгендиле.

Дагъыда КъМР-ни сыйлы артисти Султан Хажироко, КъМР-ни къырал музыка театрыны солисти Джамал Теунов эм миллет тепсеулени «Шагди» ансамбли келгенлени къууандыргъандыла.

Фестивальны эсеплерине кёре, биринчи жерни МВД-ны Май районда бёлюмюню «Патриот» командасы алгъанды.  Экинчи жерге МВД-ни Зольск районда бёлюмюню «Силачи» командасы чыкъгъанды. МВД-ны Черек районда бёлюмюню «Радуга» командасы ючюнчю болгъанды. Хорлагъанлагъа сертификатла бла багъалы саугъала берилгендиле. Биринчи жерни алгъаннга Къара тенгизни боюнунда жыйырма кюн солургъа путёвка берилгенди. Алай башха юйюрлени юслеринден да унутмагъандыла. Хар команданы сабийлерине саугъала берилгендиле.

Эришиулени ахырында келгенлеге спорт комплексни арбазында уллу тепсиле салыннгандыла, анда тюрлю - тюрлю азыкъла болгъандыла. Сабийлеге да аниматорла бла да ойнаргъа жер эм кинозона къуралгъанды.

Додуланы Мадина хазырлагъанды.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.