Регионла аралы турист маршрутну чегинде «Кавказ Gran Turismo» проектни командасы бу кюнледе СКФО-да бирыйыкълыкъ экспедициядады. Анга кёре округну битеу регионларында боллукъду.
Къабарты-Малкъарда экспертле Минги тауну тийресине баргъандыла, Европада эм бийикде орналгъан канат жол бла Элбрусха кётюрюлгендиле. КъМР-ни Курортла эм туризм министерствосу алагъа этно-аш-азыкъ, внедорожникледе жолоучулукъла да къурагъанды. «Эски Аламат» къонакъ юйде ала миллет азыкъладан татхандыла, тепсеулерибизге къарагъандыла.  Андан сора жомакълы Акъ-Топуракъ аууш бла Чегем ауузуна атланнгандыла, ингирде уа Нальчикде болгъандыла, аны ариу жерлерине къарагъандыла.
Экспедицияны баш борчу белгиленнген маршрутну сынап кёрюргеди, бир ыйыкъны ичинде Шимал Кавказны сейирлик, бир башха жерде тюбемеген табийгъатына къараргъа, аны тарыхы, адети, ашлары бла шагъырейленирге, къонакъбай адамлары бла танышыргъа боллугъун кёргюзтюргеди. Быллай бай программалы маршрут биринчи кере жарашдырылады. Экспедицияны къауумуна бу жол проектни къурау комитетини келечилери, экспертле, округну туризм индустриясыны бла федерал медиа жаны бла ишлегенле киргендиле.
Жолоучулукъ Ставрополь крайда башланнганды. Анда жолоучула Минеральные Водыни тамашалыкъ жерлеринде болгъандыла, андан сора округну битеу белгили объектлерине баргъандыла.
Шимал Кавказда туризмни айнытыу жаны бла «Кавказ Gran Turismo» проект Россейни сегиз региону бирге къабыл кёрген келишимге кёре толтурулады – республикаланы туризм жаны бла министрлери Дербентде федерал жыйылыуну кезиуюнде анга къол салгъандыла, деп билдиреди Къабарты-Малкъарны Курортла эм туризм министерствосуну пресс-службасыны башчысы Ольга Погребняк.

Кульчаланы Зульфия.