Кёп жылланы ичинде биринчи кере болуп, КъМР-де медицина учреждениялада ишлегенлени  спартакиадасы къуралгъанды. Анга республиканы битеу районларындан бла шахарларындан саулукъ сакълау учрежденияланы 300-ден аслам келечиси къатышхандыла. Ала, 12 командагъа юлешинип, спортну ондан аслам  тюрлюсюнде  къарыуларын сынагъаныдыла.
Спартакиаданы саулукъ сакълау министри Рустам Калибатов бла спорт министрни орунбасары Аналаны Аслан ачхандыла.
Рустам Калибатов быллай эришиулени мындан ары тёрели этерге мурат болгъанын чертгенди. «Спортну салукъну игилендириуде магъанасын бизден, медикледен, иги киши  да билмейди. Биз жамауатха саулукълу жашауну юлгюсюн кёргюзтюрге борчлубуз»,-дегенди ол.
Аналаны Аслан а Спартакиада спортну байрамы болгъанын, ол медицина учреждениялада ишлегенлени бла спортчуланы араларында шуёхлукъну кючлерге себеплик этеригин белгилегенди.
Эришиуле Нальчикде сабий стадионда бардырылгъандыла. Медикле футбол ойнагъандыла, узунлукъгъа секиргендиле, эр кишиле 400 метрге, тиширыула 200 метрге чапхандыла. Дагъыда шахматлада, стол теннисде къарыуларын да кёргендиле, турникде эм кёп  тартылгъанланы да ачыкълагъандыла.   
Айырмалыла майдалла, кубокла эм дипломла бла саугъаланнгандыла. КъМР-ни Парламентини депутаты, Сюд-медицина экспертизаны бюросуну таматасы Мечукаланы Алихан а спортну эки тюрлюсюнде айырмалы болгъанды.  Ол ауурлугъу 12 килограммагъа жетген ташны 8 метр 80 сантиметрге атханды эмда турникде тартылгъанланы арасында биринчи болгъанды.   «Бюгюн бери тюрлю-тюрлю усталыкъланы келечилери жыйылгъандыла, къарыуларын кёргендиле. Спорт  жаны бла кючлю жашла да бардыла»,-дегенди ол бизге, быллай жумушланы магъаналылыкъларын черте.

Тикаланы Фатима.