Жумушлары, болумлары да тюрлене барадыла

Тамбла къыралда почтада ишлегенлени профессионал байрамларыды. Быйыл бла ол бу даражада 29 кере белгиленеди. Хар бирибизни да эсибизде почта газетлени бла журналланы, посылкаланы эм пенсияланы юйюрлеге тапдыргъан органча сакъланады. Алай бюгюнлюкде почтачыланы борчлары  иги да кенгдиле.
Кесигиз ангылагъандан, газетлени окъуучуну къолуна тюшюулери да бу службаны жууаплылыгъы  бла къаты байламлыды. Ол иш къалай тамамланнганыны эм дагъыда бу сферада къысха заманда къаллай тюрлениуле боллукъларыны юсюнден биз Федерал Почта службаны КъМР-де Управлениясыны Нальчикде почта бёлюмюню  башчысы Байдаланы Фатима бла ушакъ этгенбиз.

- Бу ишге къалай бла келгенигизни юсюнден айтсагъыз эди.
- Мен бери келгенимде, почтаны ишини юсюнден алай  кёп билмей эдим. Нальчикдеги  почтаны таматасына адам излегенлерин кёргенимде, кесими сынаргъа сюйдюм.  Борчларымы толтуруп тебирегенимде сейирге къалгъан эдим мында бардырылгъан ишлени  магъаналыкъларына.
Бюгюнлюкде бизни организация халкъгъа таплыкъгъа жыйырмагъа жууукъ жумушну тамамлайды.   
- Сизни бойсунууугъузда ненча бёлюм барды?
 - Нальчикде ала 28 боладыла. Элбрус районда - 13 эм Черек районда -11. Дагъыда газетле сатхан бир ненча киоск. Адам саныны юсюнден айтханда, ала 300-ден асламдыла. Хар бёлюмде да тынгылы ишлерге итиннгенлери бек къууандырады. Борчубуз ала хайыр келтире ишлерча этиудю да, Нальчикдегиле ол ызны тутуп, жетишимли  урунадыла. Районлада да къысха заманны ичинде бу даражагъа жетербиз деп ышанама.  
Ахшы  кёрюмдюле болдурур ючюн а, келгенле бла сёлеше билиуню, алагъа бизде табаргъа боллукъ хайырлы жумушланы юслеринден билдириуню магъанасы бек уллуду. Анга  аслам эс бёлебиз. Сёз ючюн, Огъары Малкъарда  бёлюмню таматасы Темуккуланы Аминат ол жаны бла бек аламат ишлейди. Мен аны бла ёхтемленеме. Ол, иши  къуралыр, къолунда ишлегенле да ахча саугъа алыр ючюн, битеу амалланы хайырланады. Газетибизде да ма анычаланы юслеринден жазаргъа керексиз.
Ушагъыбыздан сора Черек районнга атланырыкъма. Анда «Единая Россия» политика партияны элледе связь  бёлюмлерин жангыртыу жаны бла программаны бардырабыз. Огъары Малкъарны, Огъары Жемталаны, Герпегежни эм Аушигерни почталарында ишле ахырына жетдириле турадыла. Бир ыйыкъдан бошарбыз деп ышанама.
 - Тыш болумлары  уа тюрленирикмидиле?
- Хау. Сора  башха элледегиле да, бу программагъа тюше, жангыртыла барлыкъдыла. Халлары бек осал объектлени орунларына уа жангыла ишленирикдиле.
- Почтачыла уа жетишемидиле?
- Быйылдан башлап иш хакълары 50 процентге ёсгенди. Аны себепли ала жетишедиле. Бизде асламында жыл санлары пенсиягъа чыгъаргъа  жууукъ болгъанла ишлегенлерине  юйреннгенбиз. Алай бюгюнлюкде жаш адамла да  бек сюйюп келедиле. Алгъа ол мени сейир окъуна этдире эди, шёндю уа аладан мобильный къауумла окъуна къурайбыз.
- Ол а неди?
- Сёз ючюн, отпускагъа баргъан специалистлени орунларына ала чыгъып ишлейдиле. Почтальон болмаса, газетлени, пенсияланы адамла алмаймы турургъа керекдиле? Бёлюмге кюн сайын барыр онгу хар кимни да жокъду. Аны себепли, бу къауумгъа кирген жаш адамла ол борчланы толтурадыла.
-  Газетлеге бла журналлагъа жаздырыу кампанияла уа къалай ётедиле? Адамла бегирек къайсыларына жазыладыла - республикалы газетлегеми огъесе ара басма органлагъамы?
- Тенг халда дерчады. Биз шёндю жашыракъла газетлеге жаздырылырча этерге кюрешебиз.  Алгъын асламында пенсиячыла жаздырыла эдиле. Жаш тёлю уа интернетде не жангылыкъны да табып къояды. Алай малкъар эм къабарты тилледе чыкъгъан газетлерибизде болгъан кёп информация интернетде жокъду. Дагъыда шёндюгюле тилибизни иги билир ючюн, окъургъа керекдиле. Газетледен башха жерде уа аллай шатык халда ана тилибизде къайда окъурукъса?  Аны себепли почтачыланы баш борчлары юйюрледе болгъан заманда адамларыбызгъа аны ангылатыуду. Сен миллетинги келечиси эсенг, кеси газетинги алыргъа борчлуса, мени оюмума кёре.
Сора дагъыда бир затны юсюнден айтыргъа сюеме. Мында кесибизде «Огъурлулукъну тереги» деген акцияны бардырыр муратлыбыз. Аны кезиуюнде жандауурлукъ подписка къурап, интернатлада тургъан абаданла миллет тилледе газетлерибизни алырча этергеди умутубуз.  «Заман»  бла «Адыгэ псалъэ»  бизге бу жумушда билеклик этселе, бек ыразы боллукъбуз.
- Профессионал байрамыгъызны аллында биргегизге ишлегенлеге не зат айтыргъа сюесиз?
- Бек биринчиден, ишлеринден къууансынла! Ахшы кёрюмдюле болдургъанла бизде  ахча саугъала  аладыла. Бёлюмлени таматалары да, мен да аланы аллай жетишимлерине бек къууанабыз. Хар не жаны бла монглу болсунла!
 Таппасханланы Аминат.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.