Юч жылны ичинде Къабарты-Малкъарны тогъуз профессионал билим бериу учреждениясында 40 мастерской къураргъа эм аланы керекли оборудование бла жалчытыргъа белгиленеди.
- Анга кёре быйыл – 11, келир жыл – 14 эм 2024 жылны ахырына 15 мастерской ачыллыкъдыла. Алай бла сагъынылгъан кезиуде республикада мастерскойланы 72-ге жетдирирге онг табыллыкъды,- дегенди КъМР-ни жарыкъландырыу эмда илму министри Анзор Езаов.
Сагъынылгъан проектни себеплиги бла орта профессионал билим берген учреждениялада окъуу программала федерал стандартлагъа келиширча этилликди. Республикада ишчи кадрлагъа сурам ёсе баргъаны себепли, аланы билимлерин эм сынамларын да ёсдюрюу жаны бла мадарла тири хайырланыллыкъдыла.
- Тамата класслада окъугъанлагъа усталыкъ сайларгъа болушуугъа ведомство аслам эс бурады. Ол санда «Ачыкъ эшиклени кюнлери» ётдюрюледиле. Аланы чеклеринде мастер-классла, профессионал конкурсла, курсла да ишлейдиле. Андан сора да, орта профессионал билим берген учрежденияланы окъуучулары тынгылы билим алырча, мастерскойланы ырысхы-техника онглары игилендирилликди. Ол а Worldskills Russia чемпионатны регион кесегине иги хазырланыргъа себеплик этерикди, - деп къошханды Анзор Клишбиевич.
Бизни корр.
