РФ-ни Баш прокуроруну орунбасары Андрей Кикоть КъМР-ни прокуратурасыны коллегиясыны жыйылыууна къатышханды. Анда надзор ведомство быйылны биринчи жарымында тамамлагъан ишлерини эсеплери чыгъарылгъандыла.
Тюбешиуге республиканы прокуроруну орунбасарлары, ведомствону аппаратыны бёлюмлерини таматалары, шахарланы бла районланы прокурорлары, прокуратураны аппаратыны оператив къуллукъчулары къатышхандыла. Аны ача, КъМР-ни прокурору Николай Хабаров регионда законлукъну эм право низамны болумуна, прокуратураны аланы жалчытыуда магъанасына багъа бергенди. Ол РФ-ни Баш прокуратурасыны бегимлерине тийишлиликде, надзор ведомство республикада социал-экономикасында законлукъну жалчытыугъа баш магъана бергенин чертгенди.
Андрей Кикоть прокурорланы инсанланы урунуу эркинликлерин сакълаугъа, иш бла жалчытыу соруулагъа, ёксюз сабийлени жашау журтла бла жалчытыу жумушлагъа, экология жаны бла законланы толтуруугъа энчи эс бурургъа чакъыргъанды. Ол санда табийгъатха салыннган заран ючюн тёлеулени заманында жыйыу жаны бла мадарланы белгилегенди.
Надзор жумушланы арасында уа инсанланы оюлургъа къоркъуулу юйледен кёчюрюу программаны толтуруугъа, кёп къатлы юйлени жангыртыу жумушлагъа, къалгъан-къулгъанла законсуз жыйылгъан жерлени тазалауну сорууларына, власть органла сюдню оноуларын къалай толтургъанларына, терроризмге эм экстремизмге къажау мадарлагъа энчи эс бурургъа кереклисин белгилегенди.
Андан сора да, Андрей Кикоть аманлыкълагъа, коррупциягъа къажау мадарланы тирилтиуню юслеринден да айтханды.
Коллегия прокуратураны ишин игилендириу жаны бла эсгертиулени къабыл кёрюу бла бошалгъанды.
Басмагъа Тикаланы
Фатима хазырлагъанды.