Къабарты-Малкъарны Жамауат палатасында юй хайыуанланы эм сибирь язвадан ёлген жаныуарланы асырагъан жерлени болуму тинтилгенди.

Жыйылыуну ача, палатаны табийгъат байлыкъланы хайырланыу, къудуретни сакълау эм экология жаны бла комиссиясыны башчысы Юрий Колесников билдиргенича, республиканы толтуруучу власть эм жер-жери самоуправление органлары Президентни биология къоркъуусузлукъну юсюнден буйругъун толтурурча мадарла этедиле. Аны бла бирге талай районда Беккари чунгурланы хайырланыргъа жарамагъанын, алагъа толу ремонт этилирге кереклиси да ачыкъланнганды. Алай бла Куркужин элде чунгур чачылыпды, Солдатская станицадагъы 1957 жылда Малка сууну тийресинде жайлыкъда ишленнгенди. РФ-ни Суу Кодексини 65 статьясына тийишлиликде производство эм хайырланыу, химия кир-кипчикни, уулу эм радиоактив веществоланы суулагъа жууукъда жыяргъа жарамайды. Ветеринар-санитар жорукълагъа келишмеген сибирь язвадан ёлген жаныуарла басдырылгъан жерлени иелери ким болгъанын тохташдырыргъа онг болмагъаны ючюн тап халгъа келтирилмейдиле, дегенди ол.  

Ветеринар управленияны башчысыны орунбасары Акъболатланы Зариф ангылатханыча, 2021 эм 2022 жыллагъа хайыуанланы аурууладан сакъларча, аланы багъыугъа, адамланы жаныуарладан жукъгъан аурууладан сакълаугъа, эпизоотика тынчлыкъны жалчытыугъа 1,7 миллион сом бёлюннгенди. Ол ахчагъа жаныуарла басдырылгъан жерлени къурутургъа эм иеликге бериуге да ишлени тамамларгъа белгиленнгенди. Управленияны буйругъу бла ишчи къауум къуралгъанды. Тохташдырылгъаныча, бюгюнлюкде регионда 157 биотермия чунгур барды, аладан 62-синде  сибирь язвадан ёлген хайыуанла ачыралгъандыла, 10-да биология кир-кипчик жыйылгъанды, 85-де да ёлген хайыуанладыла. Къабарты-Малкъарда Гигиена эм эпидемиология ара бла келишимни чегинде сибирь язваны къозгъагъан спораланы табарча топуракъны тинтгендиле, эсепле быллай къоркъуу болмагъанын кёргюзтгендиле.

 Комиссияны келечиси Галина Кярова аллай чунгурла адамла жашагъан жерледен къаллай узакълыкъда къазылгъанларын билирге сюйгенди. Анда болгъан информациягъа кёре, Малкада чунгур тюз да юйню хунасыны къатындады. Акъболатланы Зариф ангылатханыча, жангы жорукълагъа тийишлиликде быйылны августуна дери журтлагъа жууукъда орнатылгъан чунгурла кетерилликдиле.

 Россейни Жамауат палатасыны члени Заурби Нахушев Бахсан районда биология багуш жыйылгъан жер чачылгъанын, Прохладна, Май, Зольск, Черек, Урван, Элбрус районлада объектле да бусагъатдагъы закондательствогъа келишмегенлерин эсгертгенди. Аны бла байламлы регионну Правительствосуна Россейни Эл мюлк министерствосуну Биология кир-кипчикни ташыуну, тутууну, жарашдырыуну эм къурутууну юсюнден 626-чы буйругъун толтурурча программа жарашдырыргъа рекомендация этилгенди.

Палатаны келечиси Валерий Нагоев Ветеринария управление хайырланылмагъан Беккари чунгурланы кетериу ишни селейтмезге кереклисин белгилегенди. Комиссияны башчысыны орунбасары Шауаланы Артур жангы болумлагъа кёчюу заманда ветеринар жорукъла къабыл кёрюлгенлерин, алай аланы толтуруугъа жууаплылыкъны боюнуна бир киши алыргъа сюймегенин айтханды. Прохладна эм Урван районланы башчыларыны орунбасарлары Валерий Мамхегов, Жираслан Тхостов бла палатаны члени Сергей Якущенко аны сёзлерине шагъатлыкъ этгендиле. Ала бегимлеге къол салыннганлыкъгъа, муниципалитетлени бюджетлерини аланы толтурургъа онглары болмагъанын чертгендиле.

Жыйылыуну ахырында сейирлери болгъан организациялагъа бла ведомстволагъа эсгертиуле этилгендиле, деп билдиредиле Жамауат палатаны пресс-службасындан.

Кульчаланы Зульфия.