Къабарты-Малкъарны Башчысы Казбек Коков Инвестицияла эм предпринимательство жаны бла советни жыйылыуун бардыргъанды. Анга КъМР-ни Правительствосуну Председатели Мусукланы Алий, аны биринчи орунбасарлары Муаед Кунижев эм Сергей Говоров, ол бёлюмге министрле, банкланы, жууаплы орта эм гитче бизнесни келечилери, жамауат адамла къатышхандыла.
Анда бизнесни жюрютюуню женгиллендириу эм республикагъа инвестицияла келирча ахшы болумла къурау жаны бла «жол картаны» жашауда бардырыу сюзюлгенди.
Тындырылгъан амалланы юсюнден КъМР-ни экономиканы айнытыу министри Рахайланы Борис сёлешгенди. Къабарты-Малкъарда тюрлю-тюрлю эркинликлени алырча жумушла женгиллендирилгендиле, гитче эм орта предпринимательствону контроль-надзорлукъ жаны бла тинтиулерини саны бек азгъа келтирилгендиле.
Бизнес-омбудсмен Юрий Афасижев билдиргенича, 2021 жылны эсеплерине кёре республика бизнесге административ басынчакълыкъ этиу жаны бла бек аз индекси болгъан Россейни топ-30 регионуну санына киргенди, тизмени ахыргъы жанындан 28-чи жерге кётюрюлюп. Республиканы оноучусу коммуникациялагъа технология жаны бла къошулууну женгиллендирирча ишни кючлерге, документлени хазырлау эм къырал кадастр эсеплеуню толтурууну игилендирирге буюргъанды.
Кенгешде белгиленнгенича, «Экономиканы айнытыу эм инновациялы экономика» Къабарты-Малкъар Республиканы къырал программасына тийишлиликде МСП-ны субъектлерине билеклик этиу жаны бла иш магъаналы ызгъа саналгъанлай турлукъду. 2021 жылда КъМР-ни Гарантиялы фонду ёлчеми битеу да бирге 280 миллион сом чакълы болгъан 39 поручительство бергенди. Гарантиялы фондну поручительлиги бла тохташдырылгъан кредит келишимлени ёлчеми миллиард сомдан аслам болгъанды.
КъМР-ни микрокредитование фонду МСП-ны субъектлерине эм кеслери иш къурап кюрешгенлеге (самозанятость) ёлчеми битеу да бирге 70 миллион сом болгъан 166 микрозайм бергенди.
Республикада 6 бизнес-инкубатор ишлейди, алада 72 предприниматель орналыпды эм 345 ишчи жер къуралыпды. Андан сора да, Жумушла тапдырыу жаны бла «Мени бизнесим» ара къуралгъанды, анда информация, консультация эм методика болушлукъ тапдырылады. 2021 жылда «Гитче эм орта предпринимательлик эм энчи предприниматель башламчылыкълагъа себеплик» миллет проектни бардырылыууну хайырындан регионда МСП субъектлени эм кеслери иш къурап кюрешгенлени саны кёбейгенди.
МСП-гъа себеплик этген бу эм башха амалла чеклениулени кезиулеринде заран тюшген гитче эм орта бизнесни тохташыууна болушлукъдула. Къыйын экономика болумгъа да къарамагъанлай, республикада бизнесни «ауана тийреден» чыгъарыу иш башланнганды, аны эсеби – республиканы бюджетине келген энчи файдала кёбейгендиле, урунууну рыногун тохташдырыргъа онг табылгъанды, аны пандемиягъа дери болумгъа къайтарып. Экономикада бюгюннгю къыйынлыкълагъа да къарамагъанлай, иш андан ары тамамланады.
Регионда эл мюлкге, туризмге, промышленностьха, жумушла тапдырыу эм сатыу-алыу бёлюмлеге инвестицияла келирча магъаналы къолайлыкъ сакъланады. Инвестицияла эм предпринимательство жаны бла советни келечилери МСП субъектлеге мындан арысында да билеклик этиуню, Къабарты-Малкъаргъа инвестицияла келирча тийишли болумланы игилендирирча амалланы сюзгендиле.
КъМР-ни Башчысыны бла Правительствосуну пресс-службасы.
