Кёп болмай Къабарты-Малкъар къырал университетни приём бардырыуну управлениясыны таматасы, документлени алгъан комиссиясыны жууаплы секретары Тимур Табишев ишлерини эсеплери бла шагъырейлендиргенди.
Тёреде болгъаныча, вузда документлени 20 июньдан алып башлагъандыла. Биринчи ыйыкъда былтыр вузгъа киралмагъанла эм 9-чу классладан сора колледжде окъургъа сюйгенле келгендиле. Жаш адамланы асламысы уа аттестатларын алгъанларындан сора 25 июньдан келип башлайдыла. Алай бла бюгюнлюкде очно, заочно, ол санда «Поступи онлайн» суперсервис бла документлерин 700 абитуриент бергенди.
Тимур Арсенович быйыл бирси заманладан иги да кёп бюджет жер 2525 къураллыгъын да билдиргенди. Ол санда орта профессионал билим бериу программагъа кёре – 870, бакалавриатлагъа – 991 эм магистрлеге – 450 жер. Алай бла бюджет жерле былтырдан 600-ден асламгъа кёп болгъандыла. Аны хайыры бла хар структура бёлюмге къошакъ жерле берилгендиле.
Документлени алгъан комиссияны келечиси, быйыл магистратура программа бла байламлы къыйматлы направлениялагъа: «Информатика и вычислительная техника», «Прикладная математика и информатика», «Физика» эм башхалагъа 115 къошакъ жер бёлюннгенин да эсге салгъанды.
- Бюгюннгю эсеплеге кёре, выпускниклени кёбюсю «Лечебное дело», «Педиатрия», «Стоматология», «Экономика» эм «Юриспруденция», «Архитектура», «Дизайн», «Декоративно-прикладное искусство», «Строительство», «Журналистика» бёлюмлени сайлайдыла. Болсада арт жыллада информация технологияла жанына эс бургъанлагъа да къошула барады. Бютюнда университетде Жалгъан интеллект эм цифралы технологияла жаны бла институт ишлегенли. Ол себепден быйыл IT-технологияла жаны бла усталыкълагъа иги кесек жаш адам барыр деп бек ышынабыз,- дейди Тимур Табишев.
Эсге сала айтсакъ, КъМКъУ-ну приём бардыргъан комиссиясы ыйых кюнден сора 9.00 башлап 18.00 сагъатха дери ишлейди.
Магометланы Сулейман.
