КъМР-ни Адамны эркинликлери жаны бла уполномоченныйине  кезиулю кере Зумакъулланы Борис айырылгъанды. Аны ол къуллукъгъа КъМР-ни Парламентини жай сессиясыны ахыр жыйылыуунда депутатла бирча къабыл кёргендиле. 
Кенгешде дагъыда республикалы законланы уллу къаууму сюзюлгенди, 2022 жылны биринчи жарымында бюджет къалай толтурулгъанына къаралгъанды, кюз арты сессиягъа план да тинтилгенди.
Жыйылыуну спикер Татьяна Егорова бардыргъанды. Анга сенатор Улбашланы Мухарбий, экономиканы айнытыу министри Рахайланы Борис, КъМР-ни Башчысыны Парламентде бла сюд органлада келечиси Мадина Дышекова, КъМР-ни прокурору Николай Хабаров, Парламентде Жамауат советни башчысы Бечелланы Илияс эм башхала къатышхандыла. 
Саугъалау
РФ-ни Олимпиадалы комитетини КъМР-де бёлюмюню башчысы Александр Заруцкий, жыйылыуда сёлеше, республиканы жаш тёлюсюню спортха сейири уллу болгъанын,  олимпиадалы чемпионларыбыз аланы жетишимлеге кёллендиргенлерин белгилегенди. «Аланы арасында Мурат Кардановха хурмет бютюн уллуду. Ол жашчыкълагъа бла къызчыкълагъа ариу юлгюдю. Бюгюн да спортну айнытыу жумушлагъа тири къатышханлай турады», – деп, Мурат Карданов РФ-ни Олимпиадалы комитетини «За заслуги» деген сыйлы белгиси бла  саугъаланнганын билдиргенди эм аны анга бергенди.  
Омбудсмен
 КъМР-де Адамны эркинликлери  жаны бла уполномоченныйни къуллугъуна Зумакъулланы Борисни республиканы Башчысы кёргюзтгенди.  
– Борис Мустафаевич бу къуллукъда 2007 жылдан бери ишлейди. Аны аты республикада, андан тышында да белгилиди. Ышаныулукъ уллу болгъанына, сынаууна  РФ-ни омбудсмени Татьяна Москалькова да аны кандидатурасын къабыл кёргени да  шагъатлыкъ этеди, – дегенди Мадина Дышекова.
Ол Зумакъулланы Борисни урунуу жолуну юсюнден  къысха айтып: «Окъууну бошап, ишге киришген замандан бюгюннге дери Борис Мустафаевич кесин не жаны бла да билимли, сынаулу, намыслы адамча кёргюзтгенди», – деп, къошханды.
Зумакъулланы Борисни омбудсменнге тийишли болгъанын айтып, «Справедливая Россия» эмда «Зеленые» партияланы фракцияларыны башчылары Владимир Кебеков бла Сафарби Шхагапосоев сёлешгендиле.
Алай бла депутатла барысы да бирча Борис Мустафаевични КъМР-ни Адамны эркинликлери жаны бла уполномоченныйине къабыл кёргендиле.
КъМР-ни Конституциясына тийишлиликде, омбудсмен республиканы баш законунда къуллугъун бет жарыкълы толтурургъа ант этеди. Зумакъулланы Борис бу сыйлы къуллукъгъа  тёртюнчю кере айырылгъанын айтып: «Туугъан Къабарты-Малкъаргъа энтта жарагъаныма бек ыразыма», – деп республиканы Башчысына, депутатлагъа  анга уллу ышаныулукъ этгенлери ючюн ыразылыгъын айтханды.
Аны Татьяна Егорова да алгъышлагъанды.  
Кадрла
Депутатла Мурат Вороковну Терк сюд районну 2-чи номерли участкасыны, Зарема Кешеваны уа  Нальчик сюд округну 13-чю номерли участкасыны жарашдырыучу судьяларына тийишли кёргендиле. 
 Эсепле
2022 жылны биринчи кварталында республикалы бюджет къалай толтурулгъаныны юсюнден финансла министр Елена Лисун билдиргенди. Ол кёргюзтген шартлагъа кёре, бюджетни файдалары 11 миллиард 448 миллион сом болгъандыла, ол а жылны планыны 22 проценти тенглиди. Налогладан эм аладан тышында тюшген файдала  23,5 процентге толтурулгъандыла эмда 3 миллиард 167 миллион сом  болгъандыла. 
Къоранчланы юслеринден айтханда, жылны планы  18,9 процентге толтурулгъанды эмда 10 миллиард 664 миллион сомдан озгъанды. Министр ахчаны асламы социал магъаналы жумушлагъа къоратылгъанын энчи белгилегенди.   
Жылны башындан бери коронавирусха къажау жумушлагъа 371 миллион сомдан аслам къоратылгъанын да айтханды Елена Лисун. Ол санда 123 миллион сом дарманла сатып алыргъа берилгенди. 
Законла 
Ол кюн парламентарийле республикалы законланы проектлерини уллу къауумун къабыл кёргендиле. «КъМР-ни бир-бир республикалы законларына тюзетиуле кийириуню эмда бир-бир законланы кючлери тохтатылгъанларыны юсюнден» законну проекти 1-чи эм 2-чи окъулууда сюзюлгендиле. «КъМР-ни  Парламентини депутатыны статусуну юсюнден», «КъМР-де къырал граждан къуллукъланы тизмесини юсюнден», «КъМР-ни Правительствосуну юсюнден» эм башха республикалы законлагъа тюзетиуле кийирилгендиле. 
«Иш излегенде чырмаулагъа тюбеген инсанланы бир-бир къауумларына ишчи жерлеге квотала тохташдырыуну юсюнден» закон да эки окъулууда къабыл этилгенди. Анда сакъатланы ишге алгъанда, урунуу жорукъланы тохташдыргъанда низам белгиленеди. 
«Кабардино-Балкарская правда», «Адыгэ псалъэ» эм «Заман» газетлени уставларына редакциялы тюзетиуле да тюзге саналгъандыла. 
Бир-бир республикалы законла уа кючлерин тас этгендиле. Алада белгиленнген жорукъла федерал полномочиялагъа берилгенлери бла байламлыдыла. Ол санда «Жер тюбюнде табийгъат байлыкъланы юсюнден» республикалы законну бир-бир болумлары, «Суу объектлени хайырланыуда эм сакълауда жумушланы бирге келишдириуню юсюнден» республикалы законну 9-чу статьясы. 
КъМР-ни Парламентини бла Санкт-Петербургну Законла чыгъарыучу жыйылыууну араларында бирге ишлеуню юсюнден келишим къабыл этилгенди. 
 Дагъыда КъМР-ни Парламентини Болумуна тюзетиуле кийирилгендиле. Депутатла кюз арты сессияда ишлерини планына да къарагъандыла. Контроль эм регламент комитетни башчысы Кансаланы Еленаны айтханына кёре, план комитетлени башламчылыкълары бла энтта  тюрлендирилирге боллукъду. 
Депутатла жай сессияны 1 июльда бошаргъа, 29 августда солуудан чыгъаргъа оноу этгендиле. 

Тикаланы Фатима.