КъБР-м и Iэтащхьэ КIуэкIуэ Казбекрэ УФ-м ухуэныгъэмрэ псэупIэ-коммунальнэ хозяйствэмкIэ и министр Файзуллин Ирекрэ Москва щрагъэкIуэкIа зэIущIэм щытепсэлъыхьащ ухуэныгъэм зэрызрагъэужьынум, «Жилье и городская среда» лъэпкъ проектым хыхьэ федеральнэ программэхэр зэрагъэзащIэм, апхуэдэуи коммунальнэ IуэхущIапIэхэр къэгъэщIэрэщIэжыным епха упщIэхэм.
Файзуллин Ирек къыхигъэщащ Къэбэрдей-Балъкъэр Республикэм мы илъэсым и япэ мазитхум псэупIэу щаухуар нэгъабэ и апхуэдэ лъэхъэнэм елъытауэ процент 44-кIэ зэрынэхъыбэр. «Иджыпсту IэнатIэм къалэн нэхъыщ-хьэу щыдиIэр псэупIэ-коммунальнэ хозяйствэр къэгъэщIэрэщIэжынырщ, абы Iэмал къыдитынущ объектыщIэхэр духуэну икIи цIыхухэр фIагъ зыпылъ IуэхутхьэбзэхэмкIэ къызэдгъэпэщыну», - жиIащ министрым.
Республикэр жыджэру хэтщ «Псы къабзэ», «Ущыпсэун папщIэ къэбгъэсэбэп мыхъуну псэупIэхэр гъэмэщIэн», «Къалэ зэIузэпэщ къызэгъэпэщын», «Стимул» федеральнэ программэхэр гъэзэщIэным.
2022 гъэм республикэм «Зыхуей хуэгъэза ухуэныгъэрэ псэупIэ-коммуналь-нэ хозяйствэмрэ» унэтIыныгъэмкIэ ирагъэкIуэкI лэжьыгъэхэм ящыщу и кIэм нагъэсыну я мурадщ ухуэныгъэ, зэгъэпэщыжыныгъэ объекту 48-рэ. Федеральнэ, щIыналъэ бюджетхэм къыхэ-кIыу абы текIуэдэнущ сом меларди 7-м нэблагъэ. Ахэр нэхъыбэу егъэджэныгъэ, щэнхабзэ, спорт, узыншагъэр хъумэнымкIэ IэнатIэхэмкIэ яухуэ, зэрагъэпэщыж ухуэныгъэхэращ. «Проектхэр нэхъапэкIэ зэрыдубзыхуам тету догъэзащIэ, дгъэува пIалъэм зэрыхунэсынур, лэжьыгъэм и фIагъыр махуэ къэс къыдопщытэ. Абы кIэлъоплъ къэрал органри лэжьыгъэхэр щагъэзащIэ щIыналъэхэм я администрацэхэм я унафэщIхэри», - жиIащ республикэм и Iэтащхьэм.
«Къалэ зэIузэпэщ къызэгъэпэщын» щIыналъэ проектымкIэ къэралым щыпэрыт хэгъэгуи 10-м я деж 7-нэ увыпIэр Къэбэрдей-Балъкъэрым щиIыгъащ. Апхуэдэуи «Ущыпсэун папщIэ къэбгъэсэбэп мыхъуну псэупIэхэр гъэмэщIэн» программэмкIэ республикэр ехъулIэныгъэ къэзыгъэлъагъуэ щIыналъэхэм яхэтщ. Инфраструктурэр егъэфIэкIуэным дэIэпыкъуэгъу зэрыщагъуэтым и фIыгъэкIэ псэупIэ ухуэныгъэхэм къахэхъуэурэ макIуэ. «Стимул» федеральнэ проектымкIэ цIыхухэр зэпыу имыIэу псыкIэ къызэгъэпэщыным хуэунэтIа лэжьыгъэхэр йокIуэкI. КъищынэмыщIауэ, а унэтIыныгъэмкIэ инфраструктурэр къэгъэщIэрэщIэжыным теухуауэ 2023 - 2024 гъэхэм «Псы къабзэ» федеральнэ проектымкIэ щIыналъэм сом мелуани 130-рэ къыхуаутIыпщащ, ахэр муниципалитетхэм IэрагъэхьакIэщ.
ПсэупIэ-коммунальнэ хозяйствэм зэхъуэкIыныгъэхэр щегъэкIуэкIынымкIэ сэбэп яхуэхъу фондым зэрадэлажьэм ипкъ иткIэ, псэупIэ-коммунальнэ комплексым и объектхэр зэгъэпэщыжыным, къэгъэщIэрэщIэжыным теухуа проектхэм хоплъэ. Мы илъэсым а Iуэхум трагъэкIуэдэну сом мелуан 260-рэ хухахыну я мурадщ.
Щхьэхуэу тепсэлъыхьащ Бахъсэн щIыналъэм псы зэрыкIуэ бжьамийхэр зэбгрышыным теухуауэ ирагъэкIуэкI лэжьыгъэхэр здынэсам, бюджет кредит-кIэ объектыщIэхэр ухуэнымкIэ щыIэ Iэмалхэм. УФ-м ФинансхэмкIэ, Ухуэныгъэмрэ псэупIэ-коммунальнэ хозяйствэмкIэ и министерствэхэм дащIа зэгурыIуэныгъэхэмкIэ Бахъсэн къалэ псы зэрыкIуэ бжьамийхэр километр 70-кIэ щызэбгрышыным теухуауэ ирагъэкIуэкI ухуэныгъэхэм трагъэкIуэдэну мылъкум и япэ Iыхьэр - сом мелуан 428-р - республикэм къыIэрыхьащ. Мы илъэсым а проектыр гъэзэщIэным псори зэхэту трагъэкIуэдэну къагъэлъэгъуащ сом зы мелардым щIигъу. 2023 гъэми апхуэдиз дыдэ ихьыну къалъытащ, а илъэсым и кIэм ухуэныгъэр хьэзыр ящIыну я мурадщ. Апхуэдэуи Дзэлыкъуэ щIыналъэм псы зэрыкIуэ бжьамийхэр щызэбгрышынри и кIэм нэгъэсынымкIэ щыIэ Iэмалхэми я гугъу щащIащ зэIущIэм, абы текIуэдэну мылъкур къалъыхъуэ, апхуэдэуи ар республикэ бюджетым къыхэгъэкIынымкIэ хэкIыпIэхэри зэпалъыт.
КIуэкIуэ Казбек УФ-м ухуэныгъэмрэ псэупIэ-коммунальнэ хозяйствэмкIэ и министрым фIыщIэ хуищIащ инфраструктурэ ухуэныгъэхэр, къалэ зэIузэпэщ къызэгъэпэщынымкIэ зэгурыIуэу зэрызэдэлажьэм икIи Iуэхур къызэрыдаIыгъым папщIэ. «Абы и фIыгъэкIэ псэупIэ ухуэныгъэмкIэ пIалъэ кIыхьым тещIыхьа инвестицэ проектхэр дубзыхун, хьэрычэтыщIэ Iуэхум, мэкъумэш хозяйствэм, турист IэнатIэм зедгъэужьын тхузэфIэкIынущ. Къэбэрдей-Балъкъэрым и экономикэмкIэ абыхэм мы зэманым мыхьэнэшхуэ яIэщ», - жиIащ республикэм и Iэтащхьэм.
КъБР-м и Iэтащхьэмрэ Правительствэмрэ я пресс-IуэхущIапIэ.