Чегем шахарда мияладан абериле чыгъарыучу завод жангыдан ишлеп башлагъанды. КъМР-ни Правительствосуну Председатели Мусукланы Алий, Къырал Думаны депутаты Геккиланы Заур, промышленность, энергетика эм сатыу-алыу министр Шамиль Ахубеков, Чегем районну башчысы Юра Борсов, Промсвязьбанкны, талай промышленность предприятияланы келечилери озгъан байрым кюн заводха барып, иш къалай баргъанына къарагъандыла.
Къонакъла заводну производстволу тийрелеринде болгъандыла, алада орналгъан оборудованиягъа кёз жетдиргендиле, мияла орунла чыгъарыу къалай къуралгъаны бла шагъырейленнгендиле.
Бу завод 2007 жылда ачылгъан эди. Ишин а буруннгу жыл тохтатханды. Республиканы властьлары, мадар этип, аны къолгъа аллыкъ, кесини да бу сферада сынамы болгъан инвестор тапхандыла. Бу проектге аны бла бирге Промсвязьбанк да къатышады.
Алай бла завод жангыдан ишлеп башлагъанды. Бюгюнлюкде анда 270 адам урунады. Тынгылы ремонт этилгенден сора мияла эритген печь да хайырланылып тебирегенди. Ол бир суткагъа 220 тонна продукция береди. Юч жангыртылгъан производстволу оборудованияда мияла банкала эмда шешала жарашдырадыла. Биринчилери консервала этиуде, экинчилери уа татлы эмда гара суула чыгъаргъан предприятиялада изленедиле. Тергеуге кёре, бир жылны ичинде завод аланы барындан да 170 миллионун чыгъараллыкъды. Андан келлик файданы ёлчеми уа 1,8 миллиард сом боллукъду.
«Бу заводну ачылгъаны жаланда районнга угъай, саулай республикагъа, къыралны мияла чыгъарыучу сферасына да магъаналыды. Эсге сала айтсам, кёп тюрлю сылтаула бла аны иши тыйылгъан эди. Къысха заманны ичинде инвестор табып, аны болушлугъу бла мында хар нени да жангыдан къураргъа, ишчиле да алыргъа къолдан келгенди», - дегенди Мусукланы Алий.
Ол айтханыча, ал кезиуледе тохтагъан производстволаны жангыдан ишлетип башлаугъа шёндюледе бек уллу эс бурулады. Бюгюнлюкде бизни къыралны, саулай дунияны да экономикаларында бола тургъан тюрлениуле, башха амал къоймай, аны терк тындырыуну излейдиле. «Качестволу продукция чыгъарыу бек магъаналыды. Ол эмда жангы производствола къурау жаны бла хар неда къолубуздан келирине мен ишексизме», - деп къошханды Правительствону Председатели.
Сагъынылгъан банкны вице-президенти Алексей Анаисов а ала бу проектге къалай къошулгъанларын туура этгенди: «Биз аны терен тинтгенбиз. Заводну продукциясына жаланда Шимал Кавказда угъай, башха регионлада да сурам боллугъуна толу ийнанабыз. Проект файдалы болгъанына сёз да жокъду. Бу регионда гара эмда татлы сууланы, консерва продукция аслам хайырланылгъаны себепли, мияла орунлагъа да боллукъду сурам. Промышленностьну аягъы юсюне салыр ючюн власть органла, бизнес, урунуу коллективле эмда банкла бирлешип къармашыргъа керекдиле. Ол жетишимге келтирлигине ма бу проект шагъатлыкъ этеди».
Заводну башчысы Дмитрий Перник а аны къатында темир жол болгъаны ишни женгилтгенин чертгенди: «Ич рынокдан сора да, продукцияны тыш регионлагъа, шуёх къыраллагъа жиберирге умут этебиз. Дагъыда айтырыгъым: техника эмда административ жаны бла кёп чурум болгъан эди, алай тёгерекдегиле уа бизге аладан къутулургъа болушур ючюн къалмагъандыла».
Шамиль Ахубеков, заводну айнытыуну юсюнден айта, къыралны болушлугъу бла предприятияны кенгертирге мурат этилгенин билдиргенди. Алай бла аны тийресинде энтта да бир завод ишленирикди. Анда уа жашил мияладан продукция чыгъарыллыкъды - бир жылны ичинде 210 миллиону. Андагъы печь бир суткагъа 250 тонна мияла жарашдырлыкъды. Ишчи жерле бла уа 240 адам жалчытылынырыкъды.
Улбашланы Мурат
хазырлагъанды.
