2023 жылда Къабарты-Малкъарны вузларыны бюджет жерлерине 3,5 минг абитуриент окъургъа тюшерге боллукъду. Правительство этген мадарлагъа кёре, Россейни регионларында бийик класслы специалистлени хазырларгъа онгла къуралгъандыла, ол санда Къабарты-Малкъарда. Артыкъда цифралы экономикагъа керекли усталыкъланы эм тыш къыралладан келтирилген товарланы орнуна чыгъарлыкъ специалистлени хазырлаугъа аслам эс буруллукъду.

Д. Чернышенкону айтханына кёре, 2023-чю эм 2024-чю окъуу жыллада Россейде 590 минг студент хакъсыз окъууну башларыкъдыла. «Аланы ичинде 245 минг жер инженерлеге бла эм техника жаны бла усталыкъланы хакъсыз билим алыргъа кёргюзтюлюнеди. Экинчи жерде педагогика илмула барадыла, алагъа къырал 75 минг жерни бёлгенди. Ючюнчю жерде медицина эм  жамауат жаны бла усталыкъла тохтагъандыла, ол илмуланы окъутургъа 53 эм 68 минг бюджет жер барды Россейни вузларында. Бек уллу эс къыралны илму-технология жаны бла жалынчакъсызлыгъын жалчытыргъа эм тыш къыралладан келтирилген товарланы кесибизде  чыгъарыргъа керекли усталыкълагъа буруллукъду», - дегенди Д. Чернышенко.

Жыл сайын вузлада бюджет жерле кёпден-кёп бола барадыла, жангы бёлюмле ачыладыла, ол амалла къыралда бийик билим алыуну кенгерте баргъанына шагъатлыкъды. РФ-ни Правительствосунда белгилегеннге кёре, 2023-чю эм 2024-чю окъуу жыллагъа бюджет жерлени юлешгенде, битеу да хакъсыз билим алыргъа онг болгъан жерледен 73 проценти регион вузлагъа   бёлюнюрюкдю.

Сёз ючюн Къабарты-Малкъар къырал университетде  бюджет жерле 10 процентге кёбейгендиле эм битеу да 2410 жер боладыла.
 Университетден билдиргеннге кёре, экономиканы бийик технология бёлюмлери  ачыла тебирегенлери себепли, микроэлектроника жаны бла бийик квалификациялы специалистлени хазырларгъа уллу эс буруллукъду. Жангы окъуу жылда КъМКъУ-ни электроника эм цифралы информация  технологияланы кафедрасына 91 бюджет жер берилгенди.  «Битеу ол амалла миллет проектлени жетишимли бардырыргъа ырысхы жаны бла мурдорну къураргъа, ол санда жашауубузну битеу бёлюмлерине цифралы техналогияланы кийирирге онг берликди», - дегенди КъМКъУ-ни Информатика, электроника эм робототехника институтуну таматасы Наталья Черкесова.
В.М. Коков атлы Къабарты-Малкъар къырал аграр университетде  профессионал жаны бла билим бериуде биринчи кере 275 бюджет жер ачылады.  Битеу да тюрлю-тюрлю усталыкъланы сайлап вузда окъургъа сюйгенлеге  878 бюджет жер барды.  Асламысында аллай онг «Теплоэнергетика эм теплотехника», «Агроинженерия», «Жамауат жерледе аш азыкъны къурау эм продукцияны технологиясы» деген усталыкълагъа бериледи.

Искусствону Шимал-Кавказ институтунда окъургъа кирликлеге битеу жерле бюджетден тёленирикдиле. 2023 -чи эм 2024-чю окъуу жыллагъа битеу да 200 жер бёлюннгенди.

Андан сора Къабарты-Малкъарны абитуриентлери «Къырал жумушла» порталны юсю бла «Вузгъа онлайн кириу»  деген амалны хайырлана  къагъытларын берирге боллукъдула. Ол жангылыкъ бийик билим бериуню алыргъа аламат онгду.  РФ-ни Илму эм бийик билим бериу министерствосу белгилегеннге кёре, вузлада бюджет жерлени кёбейтиу бла байламлы иш тохтаусуз халда бардырылгъанлай турлукъду, деп билдиреди  КъМР-ни Асламлы информациялы органларыны порталы.