Предпринимательствону жашырынлыкъларына тюшюндюре

Кёп болмай Къабарты-Малкъар къырал университетде,  «Мой бизнес» ара къурап, «Digital- кеслери бир  тюрлю иш бла кюрешгенлеге сыналгъан амалланы эм цифралы жумушланы юслеринден билдириу» деген конференция ётгенди. Ол «Гитче эм орта предпринимательство эм энчи предприниматель башламчылыкълагъа болушлукъ тапдырыу» миллет проектни чеклеринде РФ-ни бла  КъМР-ни Экономиканы айнытыу министерстволарыны себепликлери бла къуралгъанды.  
Жыйылыуну ача, жалгъан интеллект эм цифралы технологияла жаны бла институтну таматасы Альберт Шапсигов КъМКъУ-гъа  регионну экономика арасы  болургъа тюшгенин магъаналы шартха санагъанды.   
 - Биз билимни, сынамны кючлерге себеплик этген тюбешиулени бардырыргъа не заманда да хазырбыз. Бюгюн кёпле аланы жарсытхан соруулагъа жууапла табарларына бек ышанама, - дегенди Альберт Хусенович. 
Конференциягъа сынамлы эм энди атламла эте башлагъан предпринимательле, бизнес бла кюреширге мурат этгенле эм башхала келгендиле. Аны ишине «Электронная торговая площадка Газпромбанка» биригиуню власть органла бла байламлыкъ жюрютюу жаны бла  бёлюмюню  таматасы  Дмитрий Терехов, КъМР-ни Экономиканы айнытыу министерствосуну Экономикагъа кадрла хазырлау эм предпринимательствону  информация-аналитика жаны бла жалчытыу бёлюмюню таматасы Фатима Абазова къатышхандыла. Анга  энчи къонакъча iVoice Technology компанияны директору, венчур инвестор  Андрей Заворин чакъырылгъанды.
- Биз, эм биринчиден,  ишибизни жетишимли бардырыргъа болушурукъ амаллагъа эс бурургъа керекбиз. Бюгюн аланы   сюзерге онг барды. Сёз ючюн,  жалгъан интеллектни бусагъатда    магъанасы  бек уллуду. Аны бизнесде, къырал сервиследе эм энчи проектлени бардырыуда да хайырланыргъа боллукъду, - дегенди Андрей Заворин.
Быйыл конференциягъа «Газпромбанкны» эм «Сбербанкны» келечилери да къатышхандыла. Ала жаш коллегаларына тюзюнлей тёлеулени, банкла бардыргъан программаланы, проектлени эм кёп башха керек жумушланы юслеринден билдиргендиле. 
Жыйылыуда гитче эм орта бизнесге къыралдан къаллай болушлукъ тапдырылгъаны да туура этилгенди. Жаш предприниматель  ишин неден башларгъа боллугъуну юсюнден да айтылгъанды, аны бла байламлы соруула эм проблемала да сюзюлгендиле.  
Ахырында 14–17 жыллары болгъанланы арасында предпринимательстводан  бардырылгъан олимпиадада хорлагъанланы саугъалагъандыла. 

Магометланы
Сулейман. 

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.