«Кавказ бизникиле жанлыды» деген патриот акцияны чеклеринде Росгвардияны КъМР-де Управлениясыны къуллукъчулары «Хорламны волонтёрлары», «Юнармиячыла» эмда «Кавказский рубеж» излеу отрядны келечилери бла тюбешгендиле. 

 Аны кезиуюнде гвардиячыла жаш адамлагъа Совет Союзну Жигити   Хусен Андрухаевни батырлыгъын эсгергендиле. Ол нёгерлерин къутхара жоюлгъанды. Жаш адамлагъа аскерчини юсюнден кино да кёргюзтюлгенди. 

Андан сора Управленияны аскер-политика иш жаны бла башчысы Алексей Трушин, жаш адамлагъа къыралыбызны тарыхын, батыр ата-бабаларыбызны эсде тутууну магъаналылыгъыны юсюнден  айтханды. «Совет аскерчилени жигитликлерин унутургъа жарамайды. Уллу Ата журт уруш берген дерследен тюз оюмла этерге, фашизм келтирген  зорлукъну билирге борчлубуз»,-дегенди офицер. 

Ахырында «Кавказский рубеж» организацияны келечилери росгвардиячылагъа ёсюп келген тёлюню туугъан журтубузгъа сюймекликге юйретгенлери ючюн ыразылыкъларын айтхандыла. 

Эсигизге салайыкъ, 1941 жылда 8 ноябрьде  21-жыллыкъ Хусен Андрухаев биргесине къуллукъ этген бёлюмню аскерчилерини артха турууларын къоруулай, «Оруслула хорлатмайдыла!» деп къычырып, аны къуршоугъа алгъан фашистлени бла  кесин  чачдыргъанды. СССР-ни Баш Советини Президиумуну Указы бла кичи политрук  Хусен Борежевич Андрухаев Совет Союзну Жигити деген атха тийишли болгъанды, ауушхандан сора.

Тикаланы Фатима хазырлагъанды.