Зи IэнатIэм хуэпэжхэр«ЦIыхум и уасэр и лэжьыгъэрщ», - жеIэ псалъэжьым. Абы и щыхьэтщ ди тхыгъэр зытедухуа щIалэхэм я лэжьыгъэр хьэлэлу зэрырахьэкIым я пщIэр лъагэ зэрищIыр, я щхьэр зэригъэлъапIэр. Зыпэрыт IэнатIэм къы-хуигъэув къалэныр нэгъэсауэ зэфIах «РОУЛД» ООО-м и лэжьакIуэхэу Тхьэгъэлэдж Iэниуар, Къэшэж Арсен, ХьэцIыкIу Беслъэн, Зеленский Виктор сымэ. Дэтхэнэри и лэжьыгъэм хуэIэрыхуэу, абыкIэ ихь жэуаплыныгъэр зыхищIэу Iуэхум пэрытщ. ЩIалэхэм я зэфIэкIыр зыхуэдэри, я цIыхугъэр здынэсри, Iуэхум зэрыхуэIэкIуэлъакIуэри мыгъэрей щIымахуэм дгъэунэхуащ. Дзэлыкъуэ щIыналъэм хиубыдэ Кичмалкэ жылагъуэм къыщыщIэдзауэ «Долина Нарзанов» зыгъэпсэхупIэм нэс ирикIуэ гъуэгум егъэлеяуэ уэсышхуэ щызэтрехьэ. АпхуэдизкIэ куууэ къытрелъхьэри, машинэхэр хэмыкIыфу хэнэу, къызэрыхэпшыжын гуэр къебджэми, узэрыбгъэдыхьэн лъэныкъуэр къыпхуэмыгъуэту, жэщ-махуэ зыбжанэкIэ абы уелIэлIэн хуей хъурт. А гъуэгум ирикIуэхэр илъэс къэс дызыIууэ гугъуехьышхуэт ар, ауэ мы лъэхъэнэр тыншу итхащ зи цIэ къитIуа а щIалэхэм я фIыщIэкIэ. Жэщ-махуэ ямыIэу абыхэм гъуэгур ягъэкъэбзащ. Мы щIы-пIэм щIымахуэм и нэхъыбапIэр жьапщэшхуэ щыIэурэ йокIуэкI. Бгъэкъабзэу уздрикIуа гъуэгум и кIэм укъиплъэжамэ, птхъуаи-умытхъуаи жыхуиIэм хуэдэу, уэсыр къытрихьэжырт. Апхуэдэхэм дежи, езэш ямыщIэу, нэху щыхункIэ гъуэгур ягъэкъэбзащ. Уеблэмэ, абыхэм къахуихуащ жэщитI-махуитIкIэ щылэжьаи.
Поделиться: ЧИТАТЬ ТАКЖЕ:
|