РФ-ни Правительствосу быйыл 5 апрельде чыгъаргъан «Инсанны сакъатлыгъын къабыл кёрюуню юсюнден» 588-чи номерли бегими бла жангы низам кийириледи.

КъМР-ни прокуроруну тамата болушлукъчусу Сотталаны Жаннаны ангылатханына кёре, жангы жорукъла 2022 жылда 1 июльгъа дери ишлеген женгиллетилген низамны алышырыкъдыла.

- Анга кёре, медицина-санитар экспертизаны бюросу тинтиулени бир ненча тюрлю бардырады. Ол къалай къураллыгъын а инсан сайлайды:  ол бюрогъа кеси келирге боллукъду. Неда келалмагъанын билдирирге, бюрону къуллукъчуларын  жашагъан жерине чакъырыргъа да эркинди. Дагъыда коммуникация онгланы хайырланып, тинтиуледен дистанциялы халда ётерге да жарарыкъды,-деп билдиргенди ол.

Аны бла бирге уа медицина тинтиулени бла инсанны медико-социал экспертизагъа ашыргъан врачла тохташдыргъан шартлада келишмеулюкле ачыкълансала, реабилитация программагъа тюзетиуле кийирирге керек эсе, неда инсан интернатда жашаса,  бюрогъа келирге тюшерикди. Адамны саулугъун  энчи диагностика аппаратда тинтирге керек болса да, ол бюрода бардырыллыкъды.

2023 жылда 1 июльдан башлап, медико-социал экспертизаны дистанция халда ётерге жарарыкъды – интернетни онгларын хайырланып. Бу амал бла бардырылгъан тинтиулени эсеплерине ырызы болмай, аны жангыдан къайтарыргъа, терсликге дау этерге сюйгенле хайырланаллыкъдыла. Инсан  жашагъан жеринде бюрогъа келип, анга федерал учреждения бла байламлыкъны къураргъа, медицина дианостикадан жангыдан ётерге онг берилликди.

Сотталаны Жаннаны ангылатханына кёре, 2024 жылда 1 июльдан башлап, медико-санитар экспертизаны къуллукъчулары тинтиулени (заочно халда) адамны аты, тукъуму белгили болмай бардырлыкъдыла. Экспертизагъа берилген документлени  энчи система къыралны регионларында бюроланы араларында юлеширикди,  саусузну жашагъан жери эсге алынырыкъ тюйюлдю.

Аны аты, тукъуму жаланда битеу тийишли жумушла толтурулгъандан сора сакъатлыкъ тохташдырылгъаныны, къайсы къауум берилгенини юслеринден документде, реабилитация программада жазыллыкъдыла. Ала инсаннга Госуслуги порталгъа ашырыллыкъдыла, неда почта бла берилликдиле. «Алай эсеплеге ыразы болмагъан тинтиуле  жангыдан къуралырларын дауларгъа эркинди. Бу кезиуде экспертиза очно халда бардырыллыкъды»,-дегенди ол.

Бегим кючюне 2022 жылда 1 июльда киреди.

Тикаланы Фатима хазырлагъанды.