Къабарты-Малкъар Республиканы Башчысы Казбек Коков «муниципал сагъатны» бардыргъанды. Аны ишине КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, КъМР-ни вице-премьери Марат Хубиев, министерстволаны, республиканы шахар округларыны эм муниципал къуралыуларыны оноучулары къатышхандыла.

Тюбешиуде 8-ден 17 жылларына дери сабийлеге тёлеуле сюзюлгендиле, дагъыда регионну тийресинде бардырылгъан миллет проектлеге бла федерал программалагъа къаралгъанды. Билим бериу системаны магъаналы сорууларына энчи эс бурулгъанды, ол санда муниципалитетле бла байламлылагъа.

«Муниципал сагъатны» ача, республиканы Башчысы, Россейни Президенти Владимир Путинни буйрукъларына тийишлиликде, къыралны социал политикасында баш магъана къыйын жашау болумлагъа тюшген инсанлагъа, бек биринчиден – сабийлери болгъан юйюрлеге, билеклик этиуге берилгенин чертгенди. Къабарты-Малкъарда айны аллындан башлап 8-ден 17 жылларына дери сабийлеге тёлеулени 12,5 мингден артыкъ юйюр алгъандыла. 1 июньдан башлап республикада урунууну эм аз хакъыны ёлчеми эм пенсияла кётюрюллюкдюле.

КъМР-ни Башчысы Казбек Коков республиканы Правительствосуна эм муниципал администрациялагъа социал тёлеулени берилгенлерин энчи къарауда тутаргъа, ангылатыу ишни бардырыргъа, инсанланы обращенияларына эс бурургъа буюргъанды, къырал болушлукъну алыуну заман болжалларына да къайгъырып.

Къабарты-Малкъар Республика миллет проектлени эм федерал программаланы толтурулуулары бла къыралны субъектлерини араларында алчыланы санында болгъаны да белгиленнгенди. Сёз жашау журт эм инфраструктура къурулушну, ырахат шахар болумланы къурауну, жол къурулушну, тозурагъан жашау журтладан адамланы кёчюрюуню юслеринден баргъанды. «Тириликни тохтатырыкъ тюйюлбюз. Ишлени качестволукълары бла аланы толтурулууларыны заман болжаллары энчи къараудадыла», – деп чертгенди Казбек Коков.

«Муниципал сагъатны» чегинде республикада экзамен кампанияны къуралыуу да сюзюлгенди. Быйыл къырал эсеп аттестациягъа 13 мингден артыкъ адам къатышырыкъды. Сынаула берилген 69 жерде тёрт мингден артыкъ специалист жумушларын тамамлайдыла. Белгиленнгенича, аны бла бирге эндиги окъуу жылгъа хазырланыу бардырылады. Алып айтханда, билим бериу махкемелени материал-техника мурдорларын кючлеу тындырылады, 29 мектепде тынгылы ремонт этиледи, аны чеклерине тийишли оборудование бла жалчытыу да киреди.

Жангы окъуу жылны аллына республикада «Точка роста» билим бериу 37 ара, Нальчик шахарны 1-чи номерли школа-интернатында «Доброшкола» ара эм Нальчик шахарда 11-чи номерли школну мурдорунда «Кванториум» ачыллыкъдыла. Республиканы 13 мектепинде 12 спорт залгъа ремонт этилликди эм кенгликге жайылгъан 4 сооружение тохташдырыллыкъды, 54 школ шёндюгюлю компьютер оборудование бла жалчытылынырыкъды.

Билим бериу бёлюмде баш борчлагъа окъутууда эсеплени игилендириу, жангы чыкъгъан окъутуу онгланы тийишлисича хайырланыу саналгъанды. Педагогланы кёллендириу, специалистлени усталыкъ даражаларын ёсдюрюу соруула да сюзюлгендиле. Республиканы оноучусу, аланы артда ишге тохташдырыр амалла да болурча, информатикадан, физикадан, химиядан, математикадан устазланы целевой халда окъутууну онгларын тинтирге буюргъанды. Муниципалитетлени таматаларына муниципал билим бериу системагъа жаш специалистле келирча этиу онгла бла байламлы предложенияларын кёргюзтюрге буюрулгъанды.