Белгили ата журтлу мобиль телесистемалы (МТС) компания бардыргъан тинтиулеге кёре, май айда болгъан байрам кюнледе Къабарты-Малкъаргъа келген жолоучуланы саны иги кесекге кёбейгенди эм ол жаны бла республика россейли регионланы ичинде алчы жерге чыкъгъанды.

Жолоучуланы Къабарты-Малкъаргъа келиулери 30 апрельде башланнганды эм ала республикада 10 майгъа дери тургъандыла. Озгъан жыл бла тенглешдиргенде туристлени саны иги да ёсгенди. Башхача айтханда, былтырдан эсе регионнга келген жолоучуланы саны он алты процентге кёп болгъанды. Асламысында республикагъа Москвадан бла Санкт-Петербургдан, Ставрополь эм Краснодар крайладан, Ростов эм Волгоград  областладан келгендиле.

«Къабарты-Малкъар  а жолоучулагъа майны байрам кюнлеринде салкъын хауасы бла эм тёреде болуучусуча сейир-тамаша къонакъбайлыгъы бла тюбегенди. Компания жыйгъан билдириулеге кёре, республикагъа келген туристлени асламысы тау лыжалада учуучу «Эльбрус» курортну сайлайдыла. Ол тийреледе уа хауа болумла бютюн да суукъ  болгъаны себепли, лыжалада эм сноубордда учуу май байрамланы ахыр кюнлерине дери созулгъанды», - деп белгилегенди МТС-ни Къабарты-Малкъарда бёлюмюню таматасы Залиханланы Эльдар.

Бизни корр.