Псори зэдогугъу

КъБР-м щыIэ МВД-м ще­кIуэкIащ фадэхэкIхэмрэ спирт зыхэтхэмрэ щэхуу зыщIхэмрэ зыщэхэмрэ зэрапэщIэтым теухуа зэIущIэ.

Абы хэтащ КъБР-м къэрал кIуэцI IуэхухэмкIэ щыIэ министерствэм и полицэм и унафэщI, полицэм и полковник Мамхэгъ Назир, республикэ МВД-м Экономикэ шынагъуэншагъэмрэ коррупцэм пэ­щIэ­тынымкIэ и управленэм и унафэщIым и къуэдзэ полицэм и полковник Бетрожь Мурат, КъБР-м щыIэ МВД-м и УГИБДД-м и унафэщI, полицэм и полковник Бэджыдэ Юрий, МВД-м и Жыла­гъуэ советым и тхьэмадэ Балъкъыз Валерий сымэ.
Мамхэгъ Назир тепсэлъыхьащ Iуэхум теухуауэ ирагъэкIуэкI лэ­жьыгъэм.
- Мы гъэр къызэрихьэрэ спиртхэкIхэр игъэкIыным ехьэлIа хабзэншагъэу 111-рэ къыщIагъэщащ, ­ГАИ-м и лэ­жьакIуэхэм яубыдащ шофёр 89-рэ, абыхэм ящыщу 42-м фадэр кърашырт КИФЩI-м и адрей щIыналъэхэм. Хабзэм къемы­зэгъыу щэ­хуу ягъэлажьэ цехи 7 зэ­хуащIащ, фадэ IэрыщI щахъумэу щIыпIэ 15 къыщIагъэщащ.
ФадэхэкI нэпцIхэмрэ спирт зыхэтхэмрэ щэхуу щагъэхьэзыр цеххэр къыщагъуэтащ Лэскэн, Тэрч, Прохладнэ, Дзэлыкъуэ, ­Аруан, Бахъсэн районхэм. 2019 гъэм щIышылэм и 5-м полицэм и участковэ уполномоченнэхэм, Урысей МВД-м и къудамэу Лэскэн райо­ным щыIэм экономикэ шына­гъуэн­шагъэмрэ коррупцэм пэ­щIэты­нымкIэ и IэнатIэм и лэжьа­кIуэхэм ящIыгъуу Урыху къуажэм къыщагъуэтащ фадэхэкI щэхуу щагъэхьэзыр цех. Абы къыщIашащ аркъэ птулъкIэ 600, бренд цIэрыIуэхэм я этикеткэхэр тегъэпщIауэ, апхуэдэуи фадэхэкI зэ­ращI Iэмэпсымэ зэмылIэужьы­гъуэхэр. Уголовнэ Iуэху къаIэтащ ­УФ-м и УК-м и 171.3 статьям и 1-нэ Iыхьэм ипкъ иту.
Полицэм и лэжьакIуэхэм фадэхэкI нэпцIхэр ягъэхьэзырын папщIэ къагъэсэбэп псори. Мы гъэм и мазищым къриубыдэу къытрахащ бренд зэмылIэужьыгъуэхэм я этикеткэхэр зытегъэпщIа птулъ­кIэ 261790-рэ, этикеткэхэр зытемылъ птулъкIэ 183824-рэ, этикеткэ рулону 180-рэ, фадэ хабзэм тету къыщIэзыгъэкIхэм я логотипхэр къызытещ картон коробкэ 3500-рэ, пластик ­птулъкIащхьэу мини 2-м нэблагъэ.
- КъБР-м щыIэ МВД-м Экономикэ шынагъуэншагъэмрэ коррупцэм пэщIэтынымкIэ и IэнатIэхэмрэ полицэм и участковэ уполномоченнэхэмрэ къапщытащ республикэм и бэзэрхэри. Прохладнэ къалэм щы­Iэ центральнэ бэзэрымрэ «Дуб­ки» бэзэрымрэ полицейхэм къыщагъуэтащ фадэхэкI зэмы­лIэу­жьыгъуэу литр 11 400-рэ, спирт зыхэт ткIуаткIуэу литр 250-м ­щIи­гъур. Абыхэм ятеухуа уголовнэ Iуэхухэр къаIэтащ. Экспертизэм къы­зэригъэлъэ­гъуамкIэ, «Дуб­ки» бэзэрым къы­щытраха фа­дэхэм яхэтщ гъащIэмрэ узыншагъэмкIэ шы­нагъуэ зы­пылъхэр, - жиIащ Мам­хэгъым.
Мы гъэр къызэрихьэрэ республикэм и полицейхэм къыщIагъэщащ транспорт 97-рэ, спиртхэкIхэр нэгъуэщI щIыпIэхэм яшэу ОВД-м къуэды щрагъэт и гъэувыпIэхэм щыIэщ автомашинэ 38-рэ. Судыр екIуэкIыху «Росал­ко­гольрегулирование»-м щахъумэну иратащ хьэлъэзешэ транспорту 8. Iуэхур зэхагъэкIмэ, абы кърикIуа­хэмкIэ транспортыр къэ­рал ­хэхъуэм хуагъэкIуэнущ. Автомаши­нэ 45-рэ зейхэм иратыжащ, судым унафэ къищтэху езыхэм я пщIантIэ дагъэтыжыну.
- ФадэхэкI IэрыщIхэр къезы­шэкIхэр къыщыщIагъэщ «Малкэ», «Урыху» федеральнэ къэпщыта­кIуэ щIыпIитIым. А постхэр иджы­рей рентген IэмэпсымэхэмкIэ къы­зэгъэпэщащи, машинэм илъыр тыншу къалъагъу. Мазищым къриу­быдэу «Малкэ» постым ап­хуэдэ хьэлъэзешэу 7 щаубыдащ икIи къытрахащ литр 11565-рэ. «Уры­ху»­ постым деж 35-рэ къы­щы­щIагъэ­щащ фадэхэкI яшэу, псори зэхэту литр 426 933-рэ къызэщIиубыдэу.
Псори зэхэплъхьэжмэ, илъэсыр къызэрихьэрэ фадэхэкI IэрыщIу къытрахащ литр 320 721-рэ.
Мамхэгъ Назир къызэрыхигъэщащи, къытраха псори физико-химие къэпщытэныгъэм пхокI. Абы­хэм гъащIэмрэ узыншагъэмкIэ шы­нагъуэ зыпылъ пкъыгъуэхэр къыщагъуэтмэ, къуаншэхэр уголовнэ жэуапым ирашэлIэнущ.
Полицэм и полковникхэу Бет­рожь Муратрэ Бэджыдэ Юрийрэ журналистхэр щыгъуазэ ящIащ ­къаIэта Iуэхум ехьэлIауэ я IэнатIэхэм зэфIагъэкI лэжьыгъэм.
Балъкъыз валерий къыхигъэщащ республикэ полицэм иригъэ­кIуэкI лэжьыгъэм мыхьэнэшхуэ зэ­риIэр икIи цIыхухэр къыхуриджащ фа­дэхэкI къыщIагъэкIыу, ящэу ирихьэлIэмэ, хабзэхъумэхэм хъыбар ирагъэщIэну.
 

 

УАРДЭ Жантинэ.

Поделиться:

ЧИТАТЬ ТАКЖЕ:

28.03.2024 - 09:03

Модернизация – капремонт и современное оснащение школ

Проведение капитального ремонта в школах республики и оснащение их современными средствами обучения в рамках реализации регионального проекта «Модернизация школьной системы образования» обсудили на

28.03.2024 - 09:03

Исправление реестровых ошибок

В минувшем году Управлением Росреестра по КБР совместно с региональным филиалом ППК «Роскадастр» выявлено и исправлено более 1200 реестровых ошибок в государственном реестре недвижимости.

28.03.2024 - 09:03

Новые технологии в работе Росреестра

О том, как цифровые технологии используются в работе Росреестра и почему удобнее подавать документы в электронном виде, как сегодня упрощены процедуры кадастрового учёта и государственной регистрац

27.03.2024 - 16:34

В Нальчике улучшили подачу воды по ул. Пятигорская

Центр управления регионом зафиксировал в социальных сетях обращения жителей городского округа Нальчик о перебоях в водоснабжении по улице Пятигорская.

27.03.2024 - 13:57

Стартует всероссийская акция «Семейные традиции»

С 29 марта по 14 апреля в рамках межведомственного культурно-образовательного проекта «Культура для школьников» пройдет Всероссийская акция «Семейные традиции», приуроченная к Году семьи и направле