Быйыл кезиулю  сабан ишлени чеклеринде 46,9 минг тонна  неда,  былтыр бла тенглешдиргенде,  109 процентге кёп семиртгич къоратыллыкъды.  Ол санда жаз башы ишлени  бардырыргъа - 67 минг тонна.  Аны юсюнден бизге КъМР-ни  Эл мюлк министерствосуну пресс-службасындан билдиргендиле.

КъМР-ни эл мюлк министри  Хасан Сижажев айтханыча, республиканы  Правительствосу семиртгичле бла жалчытырыкъ дистрибьюторланы да тизмесин белгилегенди. Бюгюнлюкде ол  сегиз компаниядан къуралады. Ала  продукцияларына  алгъан багъаларындан   беш процентден кёп къошмай сатаргъа керекдиле.  Бюгюнлюкде ала   регионну  62,77 минг тонна семиртгич бла жалчытхандыла.   Ол план бла  жаз башы кезиулю ишлеге  къоратыллыкъны  90,8 процентин тутады.  РФ-ни  Эл мюлк эм Промышленность, энергетика эмда сатыу-алыу министерстволарыны кючю бла    препаратла  сылтаусуз эм  жетерча график бла  келтириледиле. 

Къыралда  экономика жаны бла къыйын болумну кезиуюнде Правительство   азот эм азот къошулгъан, аграрчылагъа магъаналы  семиртгичлеге багъала кётюрюлмезча мадарны жашауда бардыргъаны кёплеге  себеплик болгъанды.  

 Аны бла бирге Къабарты-Малкъарда арт  жыллада аграр секторда ахшы тюрлениуле эсленедиле.  Мюлкле иги урлукъну, минерал семиргичлени, энчи техниканы, мелиорацияны хайырланнганларыны, ол санда  сынамлы специалистлени иш кёллюлюклерини  себебинден   жыл сайын тёрели битимледен бай эм качестволу тирлик аладыла.

Эсге сала айтсакъ,  былтырны эсеплерине кёре, Къабарты – Малкъар Шимал- Кавказ федерал округда  сабанлыкълагъа  минерал семиртгичле салыу бла биринчи болуп,  къыралда беш алчы регионну санына киргенди.  Регионну агрохимия службасында айтханларыча, республикада бир гектар сабанлыкъгъа 157 килограмм минерал  семиртгич салыннганды.  Бай эм качестволу тирлик алырча эм жер да кючюн тас этмезча аны болмагъанча  уллу себеплиги барды.

Сёз ючюн, былтыр   мирзеу эм къудору ёсюмлюкледен 1,286 миллион тонна тирлик жыйылгъанды. Ол,  былтыр бла тенглешдиргенде, 107,8 процентге кёпдю. Аны бла бирге сагъынылгъан кезиуде нартюхден да биринчи кере  миллиондан аслам тонна жыйылгъанын  белгилерчады. 

Магометланы Сулейман.