«КъМР-ни курортла эм туризм министри Мурат Шогенцуков Нальчикни темир жол вокзалында Къабарты-Малкъаргъа келген жолоучулагъа тюбегенди, ала республикагъа «Кавказны жемчужинасы» деген турист поездде келгендиле. Аны юсюнден башда сагъынылгъан министерствону пресс-службасы билдиргенди.

Бюгюн къонакъла жолоучулукъгъа Минги тауну этегине атланнгандыла, аланы Къабарты-Малкъарны ариу табийгъаты бла шагъырей этиучю, халкъ премияны алгъан Дарья Фролова танытады.

Республиканы ара шахарына Москва, Санкт-Петербург, Рязань, Липецк эм башха шахарладан поезд бла 238 адам келгендиле. 2022 жылда «Кавказны жемчужинасы» деген поезд Москваны Къазан  вокзалындан 22 кере жолгъа чыгъарыкъды, шабат кюнледе май айдан тебиреп, сентябрьге дери Шимал Кавказны шахарларын кёрюрге сюйгенлеге аллай онг къураллыкъды.

«Этилген тергеулеге кёре, жолоучулукъгъа 5,5 минг адам чыгъарыкъды. Ол кезиуледе туристле Шимал Кавказны беш регионуну маданият эм табийгъат тамашалыкълары бла шагъырейленирикдиле»,- деп билдиргендиле  сагъынылгъан министерствону пресс-службасындан.

 Бизни корр.