Урванны почтасында бюгюнлюкде тёрт адам урунадыла - почтальонла Лида Жилетежева бла Майя Ивазова, оператор Индира Карданова эм почта бёлюмню башчысы Людмила Тхакахова. Ала иги кесек заманны ичинде бир бирни ангылап, бир бирге сакъ болуп ишлейдиле.
Людмила Тхакахова билдиргеннге кёре, элде жюзге жууукъ таулу юйюр барды, аладан «Заман» газетни беш адам аладыла. «Аны алып башлагъан, артда да къоймайды, излейди. Бир элчибиз барды да, тюз да почта келтирилгенлей,  газетни алыргъа ашыгъады, окъуйду, сора бизге келип, къаллай сейир статья кёрдюм, деп хапарлайды. Алай кёпле уа тилни билмейбиз, окъуялмайбыз, багъады деп, сылтаула этерге кюрешедиле. Биз алагъа изданияланы магъаналылыкъларын ангылатыргъа итинебиз. Хар инсан тилин билирге, ата-анала сабийлерин ёз тиллеринде сёлеширге юйретирге борчлудула, ансыз биз миллетча тас болуп кетерикбиз. Былайда къабарты, малкъар тилде газетле уллу болушлукъ этедиле», - дейди ол. 
Кёп элледен биз жаздыргъанлыкъгъа, почта газетни келтирмейди дегенча тарыгъыуланы эшитирге тюшеди. Алай Урванда аллай жарсыу жокъду, почтальонла жумушларын тийишлисича тамамлайдыла. Газетлени багъаларыны юслеринден айтханда, бир жанындан, ала аз да кёрюнмейдиле, алай жарым жылны ичинде ёз тилингде чыкъгъан газетни алып окъур, тилинги байыкъландырыр, жангы зат билир ючюн, кёп да тюйюлдюле.   
Шёндюгю болумлада миллетлени энчиликлерин сакълауда  ана тилледе чыкъгъан газетлени, журналланы магъанасы бютюн ёседи. Ала, халкъларыбызны айтхылыкъ адамларыны, тарыхыны эм бюгюнлюкде бола тургъан ишлени юслеринден билдиргенинден тышында, тилни ариулай-тазалай сакъларгъа себеплик этедиле. «Заманда» чыкъгъан кёп материалланы бир башха изданияда табар амал жокъду. 
Кульчаланы 
Зульфия.
Сурат авторнуду.