«Заманны» журналистлери Черек районнга кезиулю жолоучулукъну районну ариу байрамына жоралагъандыла – 90-жыллыгъына.  Газетчиле районну жетишимлерини бла келир заманнга муратларыны, жамауатны жашаууну, иш кёллю абаданланы бла хунерли жаш тёлюню юслеринден материалла хазырлагъандыла.      

«Кесинги дининги бил» деген эришиуде кеси районларында хорлагъанла бу кюнледе аны республикалы кезиуюне къатышхандыла. Эсигизге салайыкъ, бу жумуш КъМР-ни Жаш тёлю министерствосуну башламчылыгъы бла бардырылады. 

Арт жыллада  Къабарты-Малкъарда солургъа сюйгенлени санына танг къошулгъанды. Сёз ючюн, быйыл тогъуз айгъа  къонакъланы саны 1,5 миллионнга жетгенди. Ол былтырдан 5 процентге кёпдю. Анга кёре турист маршрутлагъа да сурам уллулай къалады.

Универсал сермешни къорууланыу амаллары  жаны бла  бёлюмюнден республикалы чемпионатында бла биринчилигинде Жанхотия элден спортчула беш майдал къытхандыла. 

Кёп болмай «СтудПутёвка»  федерал проектни чеклеринде Донецк, Луганск республикаланы эм Запорожье бла  Херсон областьланы студентлери Къабарты-Малкъар къырал университетни билим бериу, илму эм маданият программалары бла  шагъырейленирге келгендиле.

Байрым кюн Герпегежни орта школунда «Тау жырны эки къанаты» деген фестиваль бардырылгъанды. Анда школчула эки акъылман Къулийланы Къайсынны  бла Алим  Кешоковну урушха аталгъан назмуларын малкъар, орус тилледе окъугъандыла.

Ёхтемлениу 

Яникойдан Къудайланы Тебо 2025 жылны Битеуроссей акселерация программасына къатышханды.

«РусГидро» компанияны Къабарты-Малкъарда бёлюмюнде гидроэлектростанцияланы ишчилерини араларында  эришиу бардырылгъанды. Ол кёп болмай Къашхатау ГЭС-де ётгенди эмда бёлюмню станцияларында уруннганланы  кёллерин кётюрюуде магъаналы атлам болгъанды.

КъМР-ни Башчысы Казбек Коков Президентибиз Владимир Путин салгъан миллет борчланы толтуруу бла байламлы иш республикада тохтаусуз бардырылгъаныны юсюнден кесини телеграм-каналында билдириу этгенди.